Парисын зуны олимпын наадамд оролцсон Монголын баг тамирчид дотор хүндийг өргөлтийн ганцхан тамирчин байсан нь түмэн олондоо “Алтан охин” гэж нэрлэгдсэн Мөнхжанцангийн Анхцэцэг байлаа.
Тэрбээр 81 кг-ын жинд оролцсон. Гэвч өнгөрсөн тавдугаар сард тэмцээний үеэр мөр, түнхэндээ гэмтэл авч, эмчилгээ хийлгэсэн ч богино хугацаанд бүрэн эдгэж амжсангүй. Гэлээ ч гэмтэлтэй гэж арагш суулгүй, тэмцээндээ ямар ч байсан орж, Монгол Улсынхаа нэрийг дуудуулахаар зориглосон юм.
Огцом өргөлтөд 100 кг-ыг захиалж өргөөд, түлхэлттэй өргөлтөөр 120 кг болон 125 кг-ын өргөснийхөө дараагаар М.Анхцэцэг гурав дахь өргөлтөө хийхгүй байхаар шийдлээ. Гэмтэл зовиур их байгаа учир эрсдэлийг улам нэмж гэмтэх аюулаас болгоомжиллоо.
М.Анхцэцэг сошиал хуудастаа “Бүх зүйлд, Монголчууддаа, Монгол эх орондоо талархъя. Багштайгаа гурав дахь Олимпын дэвжээндээ “Монгол” гэж дуудуулж гарлаа баярлалаа. Хайртай шүү, та нартаа” хэмээн бичсэн байна.
Харин түүний нөхөр Б.Золжаргал сошиал хуудастаа "Өвчин намдаагчаар хооллож, тамирчин хүний тэсвэр тэвчээр гаргасан ханиараа бахархаж байна” хэмээн бичсэн нь гэмтэл бэртлийн асуудал ямар хүнд байсныг илтгэсэн үгс байлаа.
Эх орноо, олимпын дэвжээгээ хүндлэн тэмцээндээ оролцож, захиалсан жингээ өргөж чадсан М.Анхцэцэгтээ талархлаа.
Сэтгэгдэл (0)
Сэтгэгдэл бичигдээгүй байна