АЛИСА ШМИДТ БАГА ЦАЛИНТАЙ Ч ӨНДӨР ҮНЭТЭЙ ГЭРЭЭНЭЭС ТАТГАЛЗЖЭЭ

25 настай герман бүсгүй Алиша Шмидтийг спорт сонирхогчид төдийгүй Дэлхийн дахин мэднэ. Инстаграмд 5 сая, TikTok-д 2 сая дагагчтай энэ бүсгүй Германы хөнгөн атлетикийн шигшээ багийн тамирчин юм.

Хэдийгээр ганцаарчилсан төрөлд том тэмцээнээс медаль авах найдлага бага ч гэлээ эмэгтэй буухиа, холимог буухиагаас бол медаль хүртчихээд байдаг. Тэгвэл өнгөрсөн ням гаригт Багамын аралд болсон олимпын эрх олгох тэмцээнд 4х400 метрийн холимог буухиад уралдаад Парисын олимпод оролцох эрхээ авчээ. Ингэснээр олимпын замд анх удаагаа гүйх боломж олдож байна. Өмнө нь 2021 оны Токиогийн олимпод оролцохоор Германы шигшээ багтаа багтан очсон ч уралдааны зам гаргаагүй юм.

Шмидтийн саяхан өгсөн нэгэн ярилцлага олны анхаарлыг их татжээ. Дэлхийн хамгийн үзэсгэлэнтэй хөнгөн атлетикч бүсгүй маань олон улсын тэмцээнд ээлжлэн оролцоход орлого нь заримдаа хүрэлцдэггүй тухайгаа ярьсан юм. Германы спортын сангаас түүнд сард 700 еврогийн л цалин олгодог аж. Мэдээж, ийм мөнгөөр олон улсад болж буй тэмцээн бүрт өөрийн дураар очоод оролцоод байх боломжгүй байдаггүй гэнэ. Хөнгөн атлетикийн тэмцээний шагналын сан гэж байдаг ч гэлээ эхний байруудад орохгүй л бол байдал хүндэрнэ. “Тэмцээн уралдаанд оролцоход шагнал өгдөг. Гэвч зарим тэмцээнд очоод огт шагналын мөнгөгүй буцах нь олон. Тэгтэл тэмцээнд оролцохын тулд замын зардал, зочид буудлын зардал гээд багагүй мөнгө гаргах ёстой болдог. Ер нь Германы хөнгөн атлетикчид яг спортоороо мөнгө олоод, амьдарна гэдэг амаргүй байдгийг шулуухан хэлчихсэн нь дээр биз. Тиймээс бид заримдаа өөр ажил хийх ёстой болдог” хэмээн Алиша Шмидт өгүүлжээ.

Хэдийгээр хөрөнгө мөнгөний ийм гачаал байдаг ч гэсэн саявтархан түүнд нэгэн компани өндөр үнийн дүнтэй хамтран ажиллах гэрээ санал болгоход татгалзжээ.

“Хоёр сарын өмнө надад нэгэн алдартай брэнд гэрээ санал болгосон. Гэхдээ би тэр брэндийг бүрэн 100 хувь дэмжихээр итгэл үнэмшилгүй байсан тул гэрээ хийгээгүй. Би эргэлзэж байгаа зүйлдээ эргэлзээгүй мэт нүдээ аньж хандаж чадахгүй. Тэр компани надад өндөр үнийн дүнтэй гэрээ санал болгосон” хэмээн Алиша Шмидт мэдэгдсэн юм.