ХАРАМСМААР ХАЙРАН...

Парисын зуны олимпын наадмаар монгол тамирчин бүсгүйчүүд маань тамираа тасартал тэмцэж, медалийн төлөө зүтгэлээ.

Тэдний нэг нь Дэлхийн аварга Пүрэвдоржийн Орхон байлаа.
62 кг-ын жинд хүрэл медалийн төлөө Киргизийн үе тэнгийн бөх Айсулуу Тыныбековатай тулахдаа 6:0, 6:2-оор онооны хангалттай хол зөрүүтэй ялж явсан ч, барилдаан дуусахаас хэдхэн секундын өмнө давхар хаман дайрахад нь зогсоож чадалгүй бөөн 4 оноо алдаж ялагдлаа.
Олон жил бөхөөр хичээллэж, их зүйл туулсны дараагаар ийнхүү олимпын медаль хүртлээ гэж баярлаж суусан монголчууд харамсан халагласан нь гарцаагүй.
Ердөө хэдхэн секунд, магадгүй ганцхан тэр дайралтыг займчуулж зөрүүлэх юмуу ямар нэгэн аргаар зогсоож чадсан бол олимпын медаль хүртэх л байлаа. Буланд гарсан дасгалжуулагч нь жаахан урьтаж мэдрээд хашхираад хэлээд өгчихсөн бол, тэрхэн агшинд илүү анхааралтай байсан бол гэх бодлууд хөвөрнө.
Өмнөөс нь харамсаж, бухимдавч олон жил биднийгээ олон сайхан ялалт, эрэмгий чанараараа баярлуулсаар ирсэн тулдаа нэг олимп алгассан ч дараагийнхад нь медалийн төлөө гарсан нь энэ билээ.
Эргэн дэвжээнээ гарсанд тань, эрч хүчтэй барилдсанд тань баярлалаа, Орхоон!