​ Т.ТУЛГА 44 ЖИЛ ТАСАРСАН МЕДАЛИЙГ АВЧРАХЫН ТӨЛӨӨ ДЭВЖЭЭНД ГАРНА

Итгэл найдварын гал хамгийн сүүлд бөхдөг гэдэг. Манай чөлөөт бөхийн тамирчид тэртээ 1968 оны олимпоос Монголын баг тамирчдын анхны мөнгө, хүрэл медалийг хүртэн ирж, хүн төрөлхтний их баяр цэнгэл наадмын баяр баясгаланг эх орондоо дэлгэсэн түүхтэй билээ.

Парисын олимпод чөлөөтийн дэвжээнээ гарсан эхний бөхчүүд маань хэдийгээр медальд хүрээгүй ч гэлээ тэдний тэмцэл, зүтгэл та биднийг Монгол гэсэн нэгэн утга, сэтгэл дор нэгтгэн зангидаж, баярласан хөөрсөн, уурласан цухалдсан ч болтугай бид нэгдэн Олимпын дэвжээ рүү нүд, сэтгэлээ чилээн ширтсээр, амжилтын чимээ чагнасаар байх авай.

Тэгвэл өнөөдөр чөлөөт бөхийн тамирчдаас олимпын медаль хүртэх гурван ч найдлага байна. Эмэгтэйчүүдийн 62 кг-д П.Орхон дагах барилдаан руу орлоо. Өчигдөр түүнийг ганцхан оноогоор ялсан Украины Ирина Коляденко дараах өрсөлдөгчдөө 4-7 онооны зөрүүтэйгээр илүүрхэн ялж, финалд шалгарлаа. Энэ нь манай П.Орхонд медалийн боломж багагүй байгааг илтгэх мэт санагдана. Гэхдээ бүхнийг дэвжээн дээр л шийдэх болно. Мэргэжлийн сэтгэлзүйчгүй явсан ч гэлээ Пүрэвдоржийн Орхонгийн хувьд ёстой үхэхээс бусдыг үзсэн хашир туршлагатай, мэхтэй бол мэхтэй, бяртай бяртай бөх мөнөөсөө мөн тул хүрэл медаль зүүчихээд зогсож байхад болдог юм болдгоороо боллоо л гэж хэлнэ.

Мөн өнөөдөр эмэгтэйчүүдийн 76 кг-ын жинд манай Э.Даваанасан, эрэгтэйчүүдийн 65 кг-ын жинд Т.Тулга нар барилдана.

Төмөр-Очирын Тулгын хувьд сүүлийн жилүүдэд дунд жинд Монголынхоо нэрийг Дэлхий, Тивийн тавцнаа гаргаж яваа, хэнбугайг ч ялчихаж чадахаар түвшинд хүрсэн бөх.

Ханжоугийн Азийн наадмын аварга, Дэлхийн аваргын хүрэл медальт, Азийн хошой мөнгөн медальт Т.Тулгын эхний өрсөлдөгч нь Дэлхийн аваргын хошой хүрэл медальт, Кубын 36 настай Вальдес Тобье. Энэ барилдаан УБ цагаар 17:26-д товлогджээ.

Хэрвээ түүнийг ялбал дараагийн учраа нь Арменийн Вазген Теванян, Гүржийн Годерзи Зебисашвили хоёрын хэн ялсан нь байх болно. Теванян Дэлхийн аваргын мөнгөн медаль хүртээд удаагүй байгаа бөх.

Т.Тулга олимпын эрх авсныхаа дараагаар “44 жилийн турш тасарсан Олимпын медалийг авахыг зорих болно” хэмээн хэлсэн юм. 1980 оны олимпын наадмаас хойш Монголын чөлөөт бөхийн эрэгтэй тамирчид медаль хүртээгүй байгааг хэлсэн нь тэр.

Энэ тасалдсан он жилүүдийг өнөөдөр Т.Тулга зогсоож, түүхийг шинээр сэргээн бичих буй за.

Тамирчдадаа амжилт хүсье!