​ ИМАН ХЭЛИФ ИЛТ ДАВУУГААР ОЛИМПЫН АВАРГА БОЛЛОО

Парисын олимпын наадмын гол дуулианы эзэн Иман Хэлиф боксын эмэгтэйчүүдийн 66 кг-ын жинд түрүүлдгээрээ түрүүллээ.

Тэрбээр дөрвөн өрсөлдөгчөө илт давуугаар ялж, олимпын алтан медалийн эзэн болсныхоо дараагаар "Би төрөлхийн эмэгтэй хүн. Бусад эмэгтэйчүүдийн л адил амьдардаг" хэмээн өгүүлжээ.

IBA түүнийг 2023 оны ДАШТ-д оруулаагүй. Учир нь шинжилгээгээр эр хүний XY хромсом илэрсэн гэж мэдээлсэн. Гэвч Олимпын наадамд оролцохыг Олон Улсын Олимпын Хороо зөвшөөрсөн юм.

Хэдийгээр эхний өрсөлдөгч Анжела Карини 46 секундын дараагаар "Би насандаа ийм хүнд цохилт мэдрээгүй" хэмээн тулаанаас татгалзаж, дараагийн өрсөлдөгч Лука Хамори "Араатан ба гоо үзэсгэлэн" үлгэрийн зургаар тулаанаа тодорхойлсон ч Иман Хэлиф Францад олноороо цагаачлан гарч амьдарцгаасан алжир гаралтай иргэдийн их дэмжлэг дор ялалт байгуулснаар олимпын аварга боллоо.

Зарим нь энэ явдлыг шударга бусын туйл гэж үзэж байгаа бол зарим нь угаасаа эмэгтэй хүн эмэгтэйчүүдийнхээ тэмцээнд оролцсон гэж өмөөрч байгаа юм.

Гэвч Иман Хэлифийн эрэгтэй хувцастай гэрэл зургууд сошиалаар өдөр бүр нэмэгдэн тархаж, харин өөрөө "Над руу маш их гүтгэлэг, дайралт ирлээ. Энэ бүхэн миний ялалтад улам амт нэмлээ" хэмээн мэдэгдснээр Алжирын баатар болж эх орон руугаа буцаж байна.