ВИНЕШ ПОГАТ ЖИНДЭЭ ОРОХЫН ТУЛД ҮСЭЭ ХУСЧЭЭ

Парисын зуны олимпын наадмын чөлөөт бөхийн эмэгтэйчүүдийн 50 кг-ын жинд Энэтхэгийн бөх Винеш Погат алтан медалийн төлөө барилдахаар шалгарсан ч жиндээ орж чадаагүй учир хасагдсан. Хэвлэлүүдийн мэдээлж буйгаар бол ердөө 100 гаруйхан граммын илүү гарсан гэнэ. Өмнөх орой жин нь гэнэт 2 кг-аар нэмэгдчихсэн тул хасах гэж маш их хичээсэн байна.

Энэтхэгийн олимпын багийн эмч Диншоу Пардивалагийн өгүүлснээр бол сүүлдээ хөлс гаргаж, жингээ хасах тэнхэлгүй болсон Винеш Погат жиндээ орохын тулд үсээ хүртэл хусчээ.

“Тамирчид бодит жингээсээ хасч доод жин рүү ордог.  Ингэвэл ялах магадлал илүү өндөртэй байдаг. Гэвч жин хасахад хатуу дэглэм барих ёстой болдог. Юу идэж уух, ямар дасгал хийх, хөлсөө хэрхэн гаргах гээд бүгд хатуу дэглэмтэй.

Винешийн хувьд ойрхон гурван их ачаалалтай барилдаан хийсэн болохоор эрч хүч оруулах зүйл идэж уух ёстой болсон. Гэтэл жин нь байх ёстойгоосоо 2.7 кг-аар илүү гарчихсан. Ингээд багаараа жин хасах гэж ажиллаж эхэлсэн. Шөнөжингөө ажилласан. Эрүүл мэндийн зүгээс бид байж болох бүхий л аргыг хэрэглэсэн. Сүүлдээ хөлс гаргаж чадахаа больсон. Тийиээс бид ярилцаад үсийг нь хуссан. Өмсгөлийг нь ч багасгаж, тайрсан. Хэдхэн миллиграмм ч гэсэн хасчих санаатай. Даанч тэгсэн ч болсонгүй. Дүндээ Винеш 100 гаруйхан грамм илүү жинтэй гарсан. Дахиад жаахан хугацаа байсан бол бид хасч амжих л байлаа. Гэвч хугацаа тулчихсан.

Нэгэнт жиндээ орж чадаагүй тул бид эргээд тамирчныхаа биеийг сэргээх эм тариа, хүнсний зүйл өгч эхэлсэн. Одоо Винешийн бие тогтвортой сайн байгаа. Цусны шинжилгээ ч бид авсан. Хэвийн байгаа эсэхийг нь тэгж шалгасан юм. Мэдээж, 100-хан граммаас болоод хасагдсандаа тамирчин өөрөө маш их харамсаж байгаа” хэмээн эмч Диншоу өгүүлжээ.