Парисын зуны олимпын наадмын чөлөөт бөхийн эмэгтэйчүүд 50 кг-ын жинд Дэлхийн хошой мөнгөн медальт Долгоржавын Отгонжаргал өнөө шөнө УБ цагаар 01:30 орчимд хүрэл медалийн төлөө барилдах болно.
Мөн өнөөдөр эмэгтэйчүүдийн 53 кг-ын жинд 2022 оны Дэлхийн АШТ-ий мөнгөн медальт Батхуягийн Хулан барилдана. Түүний эхний өрсөлдөгч нь Нигерийн Кристина Огунсаниа таарчээ.
Хэрвээ эхний учраагаа давбал дараа нь Дэлхийн хошой аварга, Японы бөх Акари Фүжинами, Дэлхийн аварга, АНУ-ын бөх Доминика Пэрриш хоёрын хэн ялсантай барилдахаар сугалаа таарсан байна.
Фүжинами бол 2023 оны ДАШТ-д түрүүлсэн мөн 2022 онд Улаанбаатарын цомын тэмцээнд түрүүлэхдээ Б.Хуланг финалд 11:0-ээр илт илүүрхэн ялсан. Харин Пэрришийг хувьд 2022 оны ДАШТ-ий финалд Б.Хулантай барилдаж, 4:2-оор ялж, дэлхийн аварга болсон юм.
Б.Хулан бол босоо өрөлттэй, золгож, том мэх хийж барилддаг. Зэвгийн Дүвчин багшийн С.Батцэцэг нарын зэрэг шавь бөхчүүд яаж барилддаг билээ, яг тийм барилтай. Доминика Пэрришийн ДАШТ-ий финалд давхар ачаад ардаа алдаж байсан.
Сонирхолтой нь тэр ДАШТ-ий эхний шатанд энэ олимпын наадмын 50 кг-ын жинд алтан медалийн төлөө барилдахаар шалгараад буй Винеш Погатыг 7:0-ээр ялж байсан юм. Тэгэхдээ баруун хутгаж дайраад бүхэл оноо авч байлаа.
Олимпын медальт, гавъяат тамирчин Б.Болортуяаг оны эхээр болсон Улсын АШТ-ий финалд тонгорч унагаад, даралтаар цэвэр ялснаар Олимпын эрхээ Б.Хулан авсан юм.
Дахин сануулахад, Б.Хулан Нигерийн бөхтэй УБ цагаар 17:49-д, харин Д.Отгонжаргал Олимпын хүрэл медалийн төлөө өнөө шөнийн 01:46-д барилдана гэж тэмдэглэжээ.
Сэтгэгдэл (0)
Сэтгэгдэл бичигдээгүй байна