Парисын зуны олимпын наадмын чөлөөт бөхийн барилдаан өчигдөр эхэлсэн. Өнөөдөр медаль хүртэх өндөр магадлалтай бөхчүүдийн нэг болох 22 настай Долгоржавын Отгонжаргал дэвжээнээ гарах болно.
20 хүрээгүй насандаа Дэлхийгээс медаль хүртэж, сүүлийн гурван ДАШТ-ээс медальтай ирсэн Долгоржавын Отгонжаргал эмэгтэйчүүдийн 50кг-ын жинд барилддаг. Сүүлийн хоёр жилийн ДАШТ-ээс мөнгөн медаль хүртсэн.
Дэлхийн чансааны 2-т бичигдэж буй учир сугалааны доод хэсэг рүү орж, чансааг тэргүүлж буй олимпын аварга, Дэлхийн 4 удаагийн аварга Юүи Сусакитай алтан медалийн төлөө л барилдаанд таарвал таарахаар тохируулсан.
Д.Отгонжаргалын эхний учраа нь Италийн бөх, 24 настай Эмануэла Лиуззи. Лиуззи 2023 оны Европын АШТ-ий хүрэл медальтай тамирчин.
Хэрвээ түүнийг ялсан тохиолдолд дараагийн учраа нь Азербайжаны 36 настай Мария Стадник, Германы 23 настай Анастасиа Блайвас хоёрын ялсан нь байх болно. Мария Стадникийг бол манай бөх сонирхогчид андахгүй. Олимпын хошой мөнгө, хошой хүрэл медальтай, Дэлхийн хошой аварга, Европын 10 удаагийн аварга, хашир туршлагатай, олон жил барилдаж буй украин гаралтай бөх. Харин Блайвас бол дээд жингээс буюу 55 кг-аас бууж орж ирж буй бөх юм. Өнгөрсөн жилийн ДАШТ-ий 55 кг-ын жинд хүрэл медаль хүртсэн.
Олимп эхлэхийн өмнө Sports Illustrated Монголын баг тамирчдаас нэг мөнгө, 4 хүрэл медаль хүртэнэ гэж таамаглахдаа Д.Отгонжаргалыг мөнгөн медаль хүртэнэ гэсэн байсан. Сүүлийн гурван ч ДАШТ-ээс медаль хүртсэн, залуухан, ид ирэн дээрээ байгаа бөхдөө өнөөдөр гялалзаж, олимпын медаль хүртэхийн ерөөл өргөе.
Д.Отгонжаргал - Э.Лиуззигийн барилдаан Улаанбаатарын цагаар 18:03-д эхэлнэ гэж олимпын албан ёсны цахим хуудаст тэмдэглэсэн байна.
Үүнээс цагийн өмнө буюу 17:07-д 68 кг-ын жинд Э.Дэлгэрмаа дагах барилдаанд Японы Нонока Озакитай барилдана.
Сэтгэгдэл (0)
Сэтгэгдэл бичигдээгүй байна