Парисын зуны олимпын наадмын эрэгтэйчүүдийн 100 метрийн зайн гүйлтэд АНУ-ын 27 настай тамирчин Ноа Лайлс түрүүлж, Дэлхийн хамгийн хурдан хүн гэх алдраа баталгаажууллаа.
Ноа Лайлс шигшээ уралдаанд 9.79 секундын амжилт үзүүлсэн бол аман хүзүүнд бичигдсэн Ямайкийн Кишан Томпсон мөн 9.79 секундын амжилт үзүүлсэн. Гэвч нарийвчилж үзэхэд Лайлсынх 9.784 харин Томпсоных 9.789 буюу 0.005 секундын зөрүүтэй гарчээ.
Ноа Лайлс Олимпын наадмын өмнө өгсөн ярилцлагадаа “Би Дэлхийн хамгийн хурдан хүн. Яагаад гэвэл сүүлчийн ДАШТ-д би түрүүлсэн. Энэ улиралд Кишан Томпсон надаас илүү хурдан цаг үзүүлсэн байж болно. Гэвч Дэлхийд би түрүүлсэн. Дэлхийн аваргыг л Дэлхийн хамгийн хурдан хүн” гэдэг юм хэмээн мэдэгдэж байлаа.
Энэ улиралд Ноа Лайлс 9.81 секундын амжилттай байсан бол Кишан Томпсон 9.79 секунд гүйчихсэн байсан юм. Тиймээс ийм яриа гарсан хэрэг. Эрэгтэйчүүдийн 100 метрийн зайд Дэлхий, Олимпод түрүүлсэн тамирчныг Дэлхийн хамгийн хурдан хүн гэж нэрлэдэг уламжлалтай.
Гэхдээ 100 метрийн Дэлхийн дээд амжилтыг домогт Усэйн Болт 9.58 секундын амжилтаараа эзэмшсэн хэвээр байгаа билээ.
Сэтгэгдэл (0)
Сэтгэгдэл бичигдээгүй байна