Парисын зуны олимпын наадмын чөлөөт бөхийн тэмцээн өнөөдөр эхэлж байна. Эхний өдөр манай бөхчүүдээс эмэгтэйчүүдийн 68 кг-ын жинд Дэлхийн аваргын мөнгөн медальт Энхсайханы Дэлгэрмаа барилдах болно. Түүний өрсөлдөгч нь Киргизстаны бөх, Дэлхийн аварга, Олимпын хүрэл медальт Мээрим Жуманазарова байхаар сугалаа гарлаа.
Чөлөөт бөхийн сугалаа ямар журмаар явуулж буйг товчхон сонирхуулья. Сугалааг барилдааны өмнөх өдрийн орой явуулна. Сугалааны өмнө Дэлхийн чансааны эхний наймд буй найман бөхийг жагсаалтаар нь онцлон ялгасан байна. Дэлхийн чансааг 2023 оны ДАШТ, 2024 оны тивүүдийн АШТ, мөн Хорват, Унгар зэрэг улсуудад болсон чансааны тэмцээний дүнг нэмж бодон гаргасан. Харин жингийн үлдсэн найман бөхийг тохиолдлын журмаар сугалж оноох болно.
Сугалааны дээд хэсэгт Дэлхийн чансааны 1, 4, 5, 8-д бичигдэж буй бөхчүүд, доод хэсэгт 2, 3, 6, 7-д бичигдэж буй бөхчүүдийг оруулна. Ингэж оноохын учир нь Дэлхийн чансааны эхний хоёр байранд бичигдэж буй бөхчүүд зөвхөн финалд таарах боломжийг бүрдүүлж байгаа юм.
Манайх бөх Э.Дэлгэрмаа Дэлхийн чансааны аман хүзүүнд буюу хоёрдугаар байрт бичигдэж буй тул сугалааны хамгийн доод хэсэгт жагсаж, эхний учраа нь Киргизстаны Мээрим Жуманазарова таарчээ.
Сэтгэгдэл (0)
Сэтгэгдэл бичигдээгүй байна