​ ШТАЙНЕР: БИ ЭХНЭРТЭЭ Л ХАРУУЛАХ ГЭСЭН ЮМ...

Олимпын түүхэнд олон гайхамшигтай ялалт тэмдэглэсэн байдаг. Том аваргууд толгой гудайлгаж, тооцоонд байгаагүй тамирчид цахиур хагалж гарч ирэхийг алийг тэр гэхэв.

2008 оны Бээжингийн олимпын наадамд хэний ч тооцоонд байгаагүй Германы хүндийг өргөгч Маттиус Штайнер 258 кг-ыг өргөж, Олимпын аварга болсон түүхтэй. Түүнийг алтан медаль зүүхдээ гартаа эхнэрийнхээ гэрэл зургийг барьж гарч ирснээр Дэлхий дахин нэгэн гунигтай түүхийг олж мэдсэн юм.

Гэхдээ тэр түүхийг хүүрнэхээс өмнө Штайнерийн тухай цухасхан өгүүлье. Штайнер бол австри хүн. Багаасаа л спортоор хичээллэсэн. Гэвч саахартай тул спортыг март гэж эмч нар зөвлөжээ. Штайнер зөвлөгөөг дагасангүй ээ. Өөрийнхөөрөө зүргэв.

Удалгүй Австрийн Хүндийг Өргөлтийн Холбооныхонтой зөрчилджээ. Ингээд иргэншлээ сольж, Германы иргэн болсон байна. Иргэншлээ сольсон учраас гурван жилийн хугацаанд олон улсын тэмцээнд оролцохыг хоригложээ. Чилийсэн гурван жил арай гэж өнгөрч тэмцээнд оролцож эхлэв. Нэгэн тэмцээний шууд дамжуулалтыг герман бүсгүй Сюзанн үзэж суугаад, Маттиастай танилцахаар шийдэж, холбоо барьжээ. Тэр хоёр анхны харцаар хэн хэндээ дурлаж, удалгүй гэрлэсэн байна.

Гэвч аз жаргалтай өдрүүд цөөн байлаа. Удалгүй эхнэр нь авто ослоор нас баржээ. “Тэгэхэд би юу ч хүсч мөрөөдөхөө больж, зөвхөн үхлийн тухай бодох болсон” гэж Штайнер ярьсан байдаг.

Дасгалжуулагч нь сэтгэл санааны хувьд маш хүнд байдалд орсон Штайнерийг хүндийг өргөлтийн заал руу хүчээр эргүүлэн авч очжээ. Тэндээ Штайнер галзуурсан мэт бэлтгэл хийх болсон байна. Удалгүй Олимп ч боллоо. Түрүүн хэлсэнчлэн хэн ч түүнийг олимпын аварга болно гэж төсөөлөөгүй байв. Том амжилтад хүрч байгаагүй болохоор тэр шүү дээ.

258 кг-ыг өргөж, Олимпын аварга болсныхоо дараа Штайнер “Би эхнэртээ л харуулах гэсэн юм. Хамтдаа шагналын тавцанд зогсохыг хүссэн юм. Эхнэр маань намайг тэнгэрээс харж байгаа гэдэгт итгэж байна. Бид шагналын хамгийн өндөр тавцан дээр байна шүү, Сюзан минь. Түүнийхээ зургийг харахаар сэтгэл зүрх минь маш их шаналах юм даа” хэмээн Штайнер өгүүлжээ.

Олимпын наадмаас хойш Штайнер том амжилт гаргаагүй. Европын АШТ-ээс медаль хүртсэн төдий. Гэхдээ л тэр эхнэртээ харуулъя гэснээ харуулж чадсан хойно хамаагүй юу байж дээ.