Парисын олимпын наадмын татами Монголын жүдочгүйгээр хоёр хоног өнжсөний дараагаар өнөөдөр манай хоёр бөх гарах гэж байна.
Эмэгтэйчүүдийн -78 кг-д жинд Отгонбаярын Хүслэн, эрэгтэйчүүдийн -100 кг-ын жинд Батхуягийн Гончигсүрэн нар барилдах юм.
Бөхийн хорхойтнууд Архангайн уугуул, аймгийн начин Б.Гончигсүрэнг андахгүй. Түүний эхний өрсөлдөгч нь украин гаралтай Израилийн бөх Петер Пальчик. Пальчик хоёр жилийн өмнө Улаанбаатарын Их дуулгад ирж барилдаад хүрэл медаль хүртсэн. Тэгэхдээ нэгэн ядруухан амьдралтай монгол эрийг хоолоор дайлж, цамцаа бэлэглэж, гарыг нь цайлгасан сайхан сэтгэлтэй залуу гэдгийг та бүхэн олж сонссон байх. Пальчик бол Дэлхийн аваргын хүрэл медальтай бөх юм.
Хэрвээ Б.Гончигсүрэн түүнийг ялвал Тажикистаны Жакхонгир Мажидов-Францын Орельен Диссэ нарын ялсантай нь барилдах болно. Гончигсүрэнгийн багтсан А хэсгийг Дэлхийн хошой аварга, Азербайжаны жүдоч Зэлим Коцоев толгойлж байгаа.
Эмэгтэйчүүдийн -78 кг-ын жинд О.Хүслэнгийн эхний учраа нь Эквадорын Ванесса Чала байх болно. Пан Америкийн аварга энэ бөхийг ялвал дараагийн өрсөлдөгч нь мөн Израилийн бөх, Дэлхийн аварга Инбар Ланир байх болно.
О.Хүслэнийг барилдаан Улаанбаатарын цагаар 16:24-д орчимд эхлэх бол Б.Гончигсүрэнгийнх түүнээс хэдхэн минутын өмнө буюу 16:06-д эхэлнэ хэмээн Олимпын албан ёсны цахим хуудаснаа тэмдэглэжээ.
Бөхчүүддээ амжилт хүсье!
Сэтгэгдэл (0)
Сэтгэгдэл бичигдээгүй байна