Евро2024-ийг ядарч цуцсан хөлбөмбөгчдийн тэмцээн гэж хөлбөмбөгийн мэргэжилтнүүд болон фанатууд үнэлж дүгнэсэн талтай.
Энэ тэмцээнд улирлын турш цөөн тоглосон юмуу эсвэл нас залуу хөлбөмбөгчид илүү сайн тоглосон нь ядралттай шууд холбоотой гэх яриа гарсан. Тэгвэл энэ сэдвээр Норвегийн шигшээ болон Английн “Манчестер Сити”-гийн довтлогч Эрлинг Холанд ярьжээ.
“Тоглогчид ямар их ядралттай байгааг та бүхэн Евро-гоос харсан биз дээ?! Тэр тэмцээнд оролцсон хөлбөмбөгчдийн дийлэнхийнх нь тамир тэнхээ барагдчихсан байгаа нь анзаарагдаж байсан. Тоглолтын чанар, түвшин тааруухан, бүр хөлбөмбөгчдийн царайг нь харахад л хичнээн их ядарсан нь ойлгомжтой харагдсан.
Ирэх улиралд ч гэсэн хөлбөмбөгчид мөн л ядралттай байх болно. Олон хоног амарч чадаагүй хөлбөмбөгч шинэ улирлын эхний тоглолтуудад ядралттай л ирж таарна. Одоо цаашид дандаа ийм байх шинжтэй. Ийм байхад хөлбөмбөгчид тоглолт бүрт шинэ сэргэг, тэсрэлттэй хурдтай байна гэдэг худлаа. Тийм боломжгүй.
Хэдийгээр хөлбөмбөгчид хөнгөн, сэргэг байхыг хүсч хичээвч улирлын туршид 70 гаруй тоглолтод оролцоод байвал эрч хүчтэй байна гэдэг бүтэшгүй зүйл” хэмээн Холанд өгүүлсэн байна.
Сэтгэгдэл (0)
Сэтгэгдэл бичигдээгүй байна