Парисын зуны олимпын наадмын жүдо бөхийн эрэгтэйчүүдийн 66 кг, эмэгтэйчүүдийн 52 кг-ын жингийн өрсөлдөөн болно.
Эмэгтэйчүүдийн 52 кг-ын жинд 23 настай Л.Сосорбарам барилдах бөгөөд эхний өрсөлдөгч нь Испанийн 21 настай Лаура Торо Солер байх болно. Л.Сосорбарам Азийн АШТ-ий хүрэл медаль, Ташкентийн Их дуулгаас мөн хүрэл медаль хүртсэн. Түүний өрсөлдөгч Солер Европын АШТ-ий гурван мөнгөн медальтай.
Эрэгтэйчүүдийн 66 кг-ын жинд Дэлхийн аваргын хошой хүрэл медальт Ёндонпэрэнлэйн Басхүү барилдана. Энэ жил 30 нас хүрсэн Ё.Басхүү D хэсгийг толгойлж орсон. Дэлхийн чансааны 5-д бичигдэж байгаа. Түүний орсон D хэсэгт Олимп, Дэлхийн медальтан байхгүй. Эхний тойрогт гоц мөргөсөн болохоор хоёр ялчихвал хэсгээ тэргүүлж, С хэсгийг тэргүүлж гарч ирсэн бөхтэй алтан медалийн төлөө барилдахын эрхийн төлөө барилдах юм. С хэсэгт Дэлхийн томчууд сугалагаар орсон. Энэ хэсэгт АНЭУ-ын өмнөөс барилдаж буй манай Б.Нармандах мөн багтсан. Б.Нармандахын эхний учраа нь Олимпын мөнгө, Дэлхийн хошой аварга, Өмнөд Солонгосын алдарт бөх Ан Баул байна.
Харин Ё.Басхүүгийн эхний учраа нь Киргизстаны Кубанычбек Айбек-Уул-Украины Богдан Ядов хоёрын ялсан нь байх болно.
Сэтгэгдэл (0)
Сэтгэгдэл бичигдээгүй байна