Бразилын алдарт хөлбөмбөгч, царайлаг залуу Кака үе тэнгийн сайхан бүсгүй Каролина Селикотой гэр бүл болж, хамгийн сайхан хос гэж нэрлэгдэж байсан цаг бий. Хоёр ч хүүхэдтэй болж, хамгийн бат бөх гэр бүлүүдийн тоонд багтаж явлаа. Гэвч нэг л өдөр эхнэр нь салахаар шийджээ.
Какагаас салах болсон шалтгаанаа Каролина тайлбарлахдаа “Магадгүй хэтэрхий төгс нөхөртэй байсан байх. Надад үргэлж халамжтай сайхан хандана. Гэвч олон жил тэгж амьдрахаар хүн залхдаг юм билээ. Би өөр зүйл хүссэн юм” хэмээн ярьсан байдаг.
Тэгвэл Кака гэр бүл салалтын талаар ийн ярьжээ. “2015 онд эхнэр маань нөхөртэй баймааргүй байна гэж шулуухан хэлсэн. “Би аз жаргал мэдрэхгүй байна. Аз жаргалгүй байгаа минь гэр бүлтэй, нөхөртэйгээс болж байгаа” гэлээ.
Дараа нь АНУ-д байхад эхнэр маань Бразил руу буцахыг хүсч буйгаа хэлсэн. “Би Бразил руугаа буцлаа. Тэнд очиж амьдрахдаа нөхөртэй баймааргүй байна” гэсэн. Хэсэг хугацааны дараа би гэр бүлийн харилцааны тухай нэгэн ном олж уншсан юм. Ер нь тэр номыг гэр бүлтэй хүмүүс нэг уншчихмаар юм билээ.
Христийн шашин шүтдэг, итгэгч хүн болохоор салахгүйн тулд чадах бүхнээ хийсэн. Христийн шашинд салах гэж гэрлэдэггүй гэдэг. Тиймээс салахгүй байхын тулд чадлаараа л тэмцсэн. Гэвч хүсээгүй тэр мөч ирсэн. “Би энэ чигээрээ байх чадахгүй. Хүсэхгүй байна” гэж эхнэр маань хэлсээр байлаа. Тэгээд Бразил руу буцаад, очмогцоо салах өргөдлөө өгчихсөн. Ингээд бид 2015 оны 12 дугаар сард гэр бүлээ цуцлуулсан. Үүгээр бидний хамтын амьдралын түүх дууссан. Бид Лука, Изабелла гэдэг хоёр сайхан үртэй.
Би нэг жил гаруй хугацаанд ганцаараа амьдарсан. Тэр хугацаанд Библи уншиж, номлогчтой байнга уулзаж зөвлөгөө авдаг байлаа. Гэвч эцсийн эцэст би нэг зүйлийг ойлгосон. Хэрвээ эхнэр чинь хамтдаа байхыг хүсэхгүй байвал түүнийг нь хүлээн авах хэрэгтэй юм билээ. Тэрнээс өөрийн хүссэнээр эхнэрээ дэргэдээ хүчээр байлгаж болохгүйг би ойлгосон” хэмээн Кака өгүүлжээ.
Сэтгэгдэл (0)
Сэтгэгдэл бичигдээгүй байна