Парисын олимпын наадам маргааш албан ёсоор нээлтээ хийнэ. Сүүлийн олон олимпын эхний өдөр жүдогийн хөнгөн жингийн тэмцээнээр эхэлж байгаа. Монголын баг тамирчдаас маргааш 6 тамирчин олимпын өрсөлдөөндөө гарна. Үүнээс энэ жил дөрвөн тэмцээнд дараалан түрүүлээд буй Дэлхийн шинэхэн аварга Бавуудоржийн Баасанхүүд найдлага тун их тавьж байгаа.
Б.Баасанхүү Хөвсгөл нутгийн охин. Энэ жил улсын аварга, Азийн аварга, Душанбэгийн Их дуулгын аварга болоод Дэлхийн мөн аварга болсон. Ид ирэн дээрээ яваа тамирчин. Дэлхийн чансааны хоёрдугаарт бичигдэж байна. Түүний дээд удамд Даншигийн арслан Годон Дампил гэх бөх байсан тухай яриа бий. Б.Баасанхүү яг 10 жилийн өмнө буюу 2014 онд Хөвсгөлийн Мөрөн хотынхоо сургуулийн биеийн тамирын багшийн удирдлага дор бэлтгэл хийж эхэлсэн. 2017 онд Улаанбаатар хотод ирж, самбо, жүдо бөхөөр хичээллэсэн.
Их тайван зан чанартай болохоор өрсөлдөгчөө айж бэргэх юмгүй барилдаж чаддаг. Ямар ч алдартай бөх байлаа гэсэн өөртэйгээ ижил жирийн л нэг тамирчин гэсэн сэтгэлзүйгээр тулдаг. Жилийн өмнө ярилцлага өгөхдөө “2024 оны олимпоос алтан медаль хүртэхийн тулд би бэлтгэлээ хийж байгаа” хэмээн итгэлтэй хэлсэн тамирчин бүсгүйн барилдааныг маргааш бүгдээрээ догдлон харж, магадгүй баярлан бахархах биз ээ.
Жүдогийн тэмцээн маргааш УБ цагаар 16:00-д эхэлнэ. Б.Баасанхүү болон бусад тамирчдадаа их амжилт хүсэн ерөөе!
Сэтгэгдэл (0)
Сэтгэгдэл бичигдээгүй байна