Парисын олимпын наадмын хөлбөмбөгийн тэмцээн албан ёсоор эхэллээ. Эхний тоглолт нь Улаанбаатарын цагаар өчигдөр буюу энэ сарын 24-ний 21:00-д Аргентин – Мароккогийн шигшээ багийн тоглолтоор эхэлсэн. Мароккогийн шигшээ баг довтлогч Софьян Рахимигийн дублиэр Аргентиныг 2:1-ээр хожлоо.
Энэ тоглолтын үндсэн цаг дээр шүүгч +15 минут нэмж сунгасан. Нэмсэн +15 минутаас нэг минут өнгөрсний дараагаар буюу +16` дээр Аргентины Медина тэнцээний гоолыг оруулж, 2:2 болгосон юм. Тэгмэгц Сэнт Этьений стадионд эмх замбараагүй байдал үүсч, үзэгчид ус ундааны саваа талбай руу чулуудахын зэрэгцээ, дуут тэслэгч шидэж, мөн зарим фанатууд талбайд гарч гүйлдсэн тул тоглолтыг тэр даруй зогсоосон.
Энэ бол хоёр багийнхны аюулгүй байдлыг хангах гэсэн шийдвэр байлаа. Үүний дараагаар стадионоос бүх үзэгчийг гаргаад, хоёр цагийн дараагаар хоёр багийг дахин талбайд гаргаж, цөөн хэдэн минут үзэгчидгүйгээр тоглуулсан байна. Гэхдээ Мединагийн гоолыг VAR-аар хянаж үзээд отонд орсон байсан тул цуцалжээ. Ингэснээр Мароккогийн шигшээ баг 2:1-ээр хожсон юм.
Олимпын эхний тоглолт ийнхүү тун драматай өндөрлөсний дараагаар Аргентины нэрт хөлбөмбөгч Лионель Месси сошиал хуудастаа “Insolitо” буюу итгэмээргүй юм гэх утга бүхий үг бичээд гайхсан эможи оруулсан байна. Өөрөөр хэлбэл, болсон явдалд итгэж ч чадахгүй байгаагаа ингэж илэрхийлжээ.
Харин Аргентины олимпын шигшээ багийн ахлах дасгалжуулагч Хавьер Машерано “Миний амьдралдаа үзсэн хамгийн том цирк энэ байлаа” хэмээн эгдүүцлээ илэрхийлжээ.
Гэхдээ энэ тоглолт эхнээсээ л эгдүүцлээр эхэлсэн. Эхлээд Машерано биш харин стадионд цугласан зарим фанатууд Аргентины төрийн дуулал эгшиглэхэд бүүлж, шүгэлдэж дургүйцэл, эгдүүцлээ илэрхийлсэн юм. Энэ нь Америкийн цомд түрүүлснийхээ дараа Аргентины шигшээ багийнхан Францын шигшээ багийнхныг арьс өнгөөр ялгаварлан доромжилсон үгс хашхиран дуулцгаасан нь сошиалаар цацагдсантай холбоотой.
“Тэд өөрсдийгөө францууд гэвч үнэндээ анголчууд. Ээж нь нигери, аав нь камерун. Тэгсэн хэрнээ паспорт дээрээ Франц гэчихсэн. Тэд бас трансжендерүүдтэй “унтах” дуртай” гэж Аргентины шигшээ багийнхны хашхиралдан хөгжилдсөн дуунд гардаг юм. Трансжендерийн тухай яагаад дурсав гэхээр хэдэн жилийн өмнө Килиан Мбаппэ хүйсээ солиулсан нэгэнтэй амрагийн харьцаатай тухай батлагдаагүй мэдээлэл гарч байсан. Үүнээс өлгөж аваад үг хийсэн хэрэг биз ээ.
Аргентины зөвхөн хөлбөмбөгийн шигшээ ч биш мөн регбигийн шигшээг Парисын олимпын үеэр шүгэлдэж, бүүлж хүлээн авлаа. Кенитэй тоглохын өмнө төрийн дууллаа эгшиглүүлэхэд нь үзэгчид мөн дургүйцлээ илэрхийлсэн бүүлсэн юм. Энэ нь мөн л арьс өнгөөр ялгаварлан доромжилсон үгс хашхиран дуулсан шигшээ багийнхантай нь холбоотой ажээ.
Сэтгэгдэл (0)
Сэтгэгдэл бичигдээгүй байна