Аргентины шигшээ баг Америкийн цомд түрүүлснийхээ дараахан Энцо Фернандес нарын зэрэг хөлбөмбөгчид Францын шигшээ багийнхныг хар арьстнууд хэмээн арьс өнгөөр ялгаварлан гадуурхаж, доромжилсон утга бүхий зүйлс хашхиран, дуулцгаасан бичлэг тарсан.
Энцо Фернандес энэ үйлдлийнхээ бурууг хүлээж, уучлалт гуйсан. Гэвч зөвхөн Францын Хөлбөмбөгийн Холбоо ч бус хар арьст хөлбөмбөгчид ч өөрсдийгөө доромжлуулсан гэж үзэж байгаа юм. Тухайлбал, Английн “Челси”, “Вест Хэм”-д тоглож явсан Карлтон Коул эгдүүцэн, багаараа хамтдаа хашхиран дуулсан тэрхүү доромж дууны талаар багийн ахлагч Лионель Месси байр сууриа илэрхийлэх ёстой гэж үзэж буйгаа хэлжээ.
“Хөлбөмбөгийн түүхэн дэх шилдэг тоглогч гэгддэг нэгэн хүн Аргентины шигшээд байгаа. Мессиг би хэлж байна. Түүнд хэлэхэд, Месси одоо үгээ хэл. Учир нь Энцо Фернандесаас Лионель Месси илүү том тоглогч мөн багийн ахлагч учраас үгээ хэлэх ёстой. Багийнхныхаа үйлдлийн талаар юу бодож яваагаа хэл л дээ.
Үгээ хэлэхгүй бол өөрт чинь энэ бүхэн ямар ч хамаагүй гэсэн үг. Хар арьст над шиг нэгэн юунд эмзэглэж байгаа нь түүнд огт хамаагүй хэрэг. Надаас гадна бусад хар арьст хөлбөмбөгчдийг үл ойшоосон хэрэг. Тэрэнтэй хамт хар арьст хөлбөмбөгчид тоглож байсан байж таараа. Тэд ч түүнд хамаагүй юм байна. Энэ эс үйлдэл нь Мессиг хувиа хичээсэн хүн гэдгийг л харуулна. Үгүй бол үзэл бодлоо илэрхийл. Ямар нэгэн зүйл хэл. Би үүнд Мессиг буруутгаж байгаа. Месси үгээ хэлэхгүй байгаа нь хувиа хичээсэн явдал” хэмээн Карлтон Коул өгүүлжээ.
Сэтгэгдэл (0)
Сэтгэгдэл бичигдээгүй байна