22 настай англи тоглогч Мэйсон Гринвүдийг Францын “Марсель” 30 сая еврогоор авлаа. Найз бүсгүйдээ хүч хэрэглэсэн гэх хэргийн улмаас олон сарын турш гэр хорионд орж, хөлбөмбөгөөс хэсэгтээ холдсон залуухан тоглогчийн хэргийг шүүх хэрэгсэхгүй болгож шийдсэн.
Хэргийн хохирогч гэх найз бүсгүй Харриет Робсон шүүхэд мэдүүлэг өгөхөөс татгалзсан учир Гринвүдийн хэргийг хаахад хүрсэн юм. Энэ нь зарим хүмүүст таалагдаагүй. Хүчирхийлэгчийг гэм зэмгүй мэт зүгээр суллалаа гэж зэвүүцсэн. Гэлээ ч нэгэнтээ шүүхээс гэм буруугүйд тооцогдсон тул Мэйсон Гринвүд хөлбөмбөгчийн замналаа эргэн сэргээхийн зэрэгцээ найз бүсгүй Харриет Робсонтойгоо гэрлэж, хүүхэдтэй ч болоод амжсан билээ.
Өнгөрсөн улирлыг Испанийн “Хетафе”-д зээллэгээр тоглож өнгөрүүлэхдээ ч олны анхаарлыг татсан сайн тоглогч хэвээрээ гэдгээ нотлон харуулсан. Үндсэн хөл нь баруун, зүүн аль нь болохыг мэргэжилтнүүд хүртэл ялгаж чаддаггүй, Фил Фодений тэмдэглэн хэлснээр бол “хамгийн сайн төгсгөгч” Мэйсон Гринвүдийг авахаар Итали, Испани, Францын хэд хэдэн клуб үнэ хаялцсаны эцэст Францын “Марсель”-ийг сонгосон юм.
“Марсель”-д саяхныг хүртэл Английн “Брайтон”-ыг удирдаж байсан Роберто Де Зерби дасгалжуулагчаар очсон нь ч Гринвүдийн сонголтод нөлөөлсөн байх талтай. Ийнхүү унаган багын “Манчестер Юнайтед” клубээсээ явж, Францын клубт очсон ч түүнийг зарим фанатууд нь хүлээж авахыг хүсэхгүй, дургүйцлээ илэрхийлсээр байгаа.
““Марсель”-ийн түүх, нэр алдрыг хайрлахдаа энэ клубыг би дэмждэг байлаа. Гэвч ингэж нэрээ хөөдөх гэж” гэх зэргээр зарим фанатууд эгдүүцэж, клубын удирдлагын шийдвэрийг эсэргүүцсэн. Тэгвэл Гринвүд энэ зөрчилдөөнд оролцолгүй, зөвхөн хөлбөмбөгтөө л анхаарахыг хүсч буйгаа мэдэгдсэн байна.
“Намайг авахаар санал тавьсан тухай дуулмагцаа би “Марсель” дээр маш анхаарч үзсэн. Эндэхийн стадион, фанатууд гайхамшигтай. Англид хүртэл “Марсель”-ийг мэддэг, Европын хамгийн хурц, тод клубүүдийн нэг гэж хүндэлдэг. Мөн багийн шинэ дасгалжуулагч Роберто де Зерби ч миний хүндлэлийг хүлээсэн хүн. Түүний удирдлага дор тоглоно гэж бодохоор яарч байна.
Дасгалжуулагчийн хүссэн бүх байрлалд гарахад бэлэн. Багтаа туслахын тулд чадах бүхнээ хийх болно. “Марсель”-ийн төлөө бүх хүчээ дайчлан тоглоно. Зарим фанатуудын эгдүүцэл, дургүйцлийг би ойлгож байна. Гэхдээ би хэнтэй ч зөрчилдөхгүй. Миний хувьд зөвхөн урагшаагаа харж, “Марсель”-ийн нэг хэсэг байж, хөлбөмбөгөө тоглохыг л хүсч яваа. Миний гэр бүлийнхэн ч энд аз жаргалтай байна гэдэгт итгэж байна. Дахиад хэлэхэд, би зөвхөн хөлбөмбөгтөө л бүх анхаарлаа хандуулах болно” хэмээн 2029 онд хүртэл Марсель хотын клубтэй гэрээ байгуулсан Мэйсон Гринвүд мэдэгджээ. Тэрбээр шинэ клубтээ очоод 10 дугаарыг авчээ.
Р.Гэгээ
Сэтгэгдэл (0)
Сэтгэгдэл бичигдээгүй байна