АРГЕНТИНЫ ШИГШЭЭГИЙНХЭН АРЬС ӨНГӨӨР ЯЛГАВАРЛАН ДОРОМЖИЛЖ, ЭНЦО ФЕРНАНДЕС ФРАНЦЧУУДЫН ДУРГҮЙ ХҮРГЭВ

Америкийн цомын тэмцээнд Аргентины шигшээ финалд Колумбыг нэмэлт үед Лаутаро Мартинесийн оруулсан гоолоор хожиж, түрүүлсэн.

Гэвч аваргын баяраа тэмдэглэхдээ арьс өнгөөр ялгаварлан доромжилсон утга агуулга бүхий дуу дуулснаар дуулиан тариад амжлаа. Катарт болсон ДАШТ-д түрүүлснийхээ дараагаар Аргентины шигшээ багийнхан Францын шигшээгийнхнийг доромжилсон үгс бүхий дуу дуулцгаасан юм. Тэгвэл энэ удаад мөн тэр дуугаа давтан дуулж, баяраа тэмдэглэжээ. Энэ дуу гэж хэлж болохоор хашхираандаа Францын шигшээгийнхэн үнэндээ африкчууд, тэд трансжендерүүдтэй энгэр зөрүүлэх дуртай гэх утгатай үгс хашхирцгаасан байна.
Шууд эфирээр цацагдсан тэдний энэ доромжлол Францын шигшээгийнхний эгдүүцлийг төрүүлж, Аксель Дисаси, Вэсли Фофана, Мало Гүсто нар Английн “Челси”-д хамтдаа тоглодог Энцо Фернандест бухимдан, сошиалд түүнийг дагахаа больсон байна. Францын Хөлбөмбөгийн Холбоо ч албан ёсоор гомдол гаргажээ.

Энцо Фернандес багийнхантайгаа хамт хашхиралдан дуулж буй тэрхүү доромж дууны талаар Английн “Челси” албан ёсны мэдэгдэл ч гаргалаа. Мэдэгдэлдээ хэзээ ч арьс өнгөөр ялгаварлан доромжлохыг дэмжихгүй гэдгээ илэрхийлээд, багийнх нь тоглогч Энцо Фернандес албан ёсоор уучлалт гуйж, хийсэн үйлдэлдээ харамсаж буйг цохон тэмдэглэжээ.
23 настай аргентин хагас хамгаалагч Энцо Фернандес багийнхнаасаа болон ялангуяа дээр дурдсан гурван франц хөлбөмбөгчөөс тусгайлан уучлалт гуйсан байна. Тэрбээр хэнийг ч арьс өнгөөр ялгаварлан доромжлохыг хүсээгүй гэдгээ илэрхийлээд, шигшээ багийнхнаа дуулсныг дагасан төдий гэж мэдэгджээ.
Хэвлэлүүдийн мэдээлж буйгаар бол Энцо Фернандес энэ үйлдлийнхээ төлөө ихээхэн хэмжээний торгууль төлөх юм байна.