Бүтэн сарын турш үргэлжилж буй Европын АШТ-ий финал өнөө шөнө Улаанбаатарын цагаар 03:00-д Германы нийслэл Берлин хотын Олимпын стадионд болно. Финалд Испани – Английн шигшээ баг шалгараад байгаа билээ.
Тус тоглолтын өмнө олон мэргэжилтэн олон янзын таавар уралдуулж байна. Ихэнх нь энэ тэмцээнд онцгой эрч хүчтэй байгаа Испани хожиж, аварга болно гэж хэлж байгаа юм. Мэдээж, мөн Английн шигшээ багийн хожилд итгэж, 1966 оноос хойш анх удаагаа Тив, Дэлхийн чанартай тэмцээнд түрүүлэх болно гэж найдаж буй фанатууд бий.
Тэдний нэг нь Английн шигшээ болон “Манчестер Юнайтед”, “Эвертон”-д тоглож явсан, эдүгээ Чемпионшип лигийн “Плимут” багийн ахлах дасгалжуулагч Уэйн Руни юм. Тэрбээр финалын тоглолтод нэгэн хөлбөмбөгчийг гоол оруулна гэж бодож буйгаа хэлжээ.
“Майнүгийн талаар л надад нэг зөв совин татаад байх юм. Майнү энэ финалд гоол оруулж, тэр гоол нь шийдвэрлэх гоол байх юм шиг санагдаад байна. Яагаад ингэж бодож байна гэхээр Испанийн шигшээ Английн довтолгооны тоглогчид болох Кейн, Бэллингэм, Фоден, Сака нарыг сайн хааж, хамгаалж тоглох болно. Энэ нь эргээд Майнүд боломж үүсэх нөхцөлийг бүрдүүлнэ. Майнү талбайн гүнээс урагш довтолгоонд туслан орж, хэд хэдэн удаа хаалга руу цохилт хийхийг бид энэ тэмцээний үеэр харсан шүү дээ” хэмээн Руни өгүүлжээ.
Сэтгэгдэл (0)
Сэтгэгдэл бичигдээгүй байна