НГОЛО КАНТЭГ ҮНЭЛЖ ХАЙРЛАХ 7 ШАЛТГААН

“Нэг, хоёр, гурав, дөрөв, тав, зургаа, долоо

Надад амьдрах долоон шалтгаан хэрэгтэй...” хэмээн яруу найрагч Б.Галсансүх шүлэглэсэн нь бий. Тэгвэл Францын шигшээгийн хагас хамгаалагч Нголо Кантэг үнэлэх долоон шалтгааныг энд дурдая.

Шавилхан биетэй ч талбайн хаана л бол хаана гүйж явдаг энэ эр үргэлж нүүрний буянтай, баясгалантай, цуцашгүй хөдөлмөрч зангаараа олны хайр талархыг хүлээсэн юм.

Алдар цолыг авч болдог ч ард түмний хайр хүндлэлийг тэр болгон хүртээд байдаггүй. Кантэгийн хувьд алдар цолоо ч авсан, ард түмний хайр талархлыг ч хүлээсэн нэгэн. За ингээд 7 шалтгаан:

• Мэргэжлийн хөлбөмбөгчийн анхны гэрээгээ байгуулахаар “Булонья” клубын баазад очихдоо хүүхдийн скүтэр унаж очжээ.
• Хөлбөмбөгчийн замналынхаа хажуугаар ирээдүйд хэрэг болно хэмээн тооцож нягтлан бодогчийн дамжаанд суралцсан байна.

• Английн “Лестер”-т очсоныхоо дараагаар бэлтгэлийн бааз руу өдөр бүр хэдэн километр газар гүйж очдог байжээ. Багийнхан нь ятган ятган, арай гэж явган амьдралаас нь холдуулж, машин авахад хүргэв.
• Гэвч багийнхныхаа зөвлөсний дагуу үнэтэй том автомашин авсангүй. Хямд, жижигхэн Mini Cooper авч унасан байна.
• “Лестер”-ийн академиас хөөгдсөн франц залууг орон гэргүй болоход хэдэн сар гэртээ байлгажээ.
• Сүмд тааралдаж танилцсан “Арсенал”-ын фанатынд очиж, хамтдаа FIFA тоглов.
• Сайн харилцаатай байдаг сэтгүүлч эрийн охиных нь хуримд очиж,  баярлуулжээ...

Мэдээж, үүнээс өөр олон сайн сайхан зүйлс бий. Дэлхийн аварга болчихоод “Алтан цом”-ыг өргөлгүй инээн зогсоход багийнх нь бараг түлхэн түлхэн цомд хүргэж буй бичлэг ч байдаг. Гэхдээ мань хүн бас зальтай гэж байгаа. Хөзөр тоглохдоо ялангуяа их луйварддаг гэж багийнхан нь ярьсан байдаг.

Эден Азар түүний тухай “Заримдаа би бэлтгэл дээр хоёр Кантэ зэрэг хараад байдаг юм. Нэг харахад зүүнд гүйж явдаг. Тэгснээ гэнэт баруунд ч гарчихсан байх шиг. Ер нь ихэр юм биш үү дээ” хэмээн наргиа хийсэн нь бий.

Үнэндээ Кантэгийн олны анхаарлаас хол байх хүсэл нь олны анхаарлыг төвд оруулдаг ч гэж хэлж болох биз.

2018 оны ДАШТ-ий өмнөх шигшээ багийн цугларалтад Кантэ жаахан хоцорч очсон юм билээ. Дасгалжуулагч Дидье Дешам яагаад хоцорсныг нь лавлахад “Уучлаарай, галт тэрэг хугацаанаасаа хоцорч ирээд...” гэжээ. Тэгсэн Дешам инээмсэглэн мөрийг нь алгадаад “Галт тэрэг хоцроод байвал зүгээр гүйчихэж бай л даа. Чи илүү хурдан шүү дээ” гэж хошигнож буй бичлэг цацагдаж байлаа.

Нголо Кантэ бол Дэлхийн аварга, Аваргуудын лигийн аварга, Английн аваргын цомыг өргөсөн хөлбөмбөгч. “Лестер”-ийн үнсгэлжингийн үлгэрийн гол баатруудын нэг билээ.

Р.Гэгээ