ДАРВИН НУНЬЕСТ УРТ ХУГАЦААНЫ ШИЙТГЭЛ ОНООЖ БОЛЗОШГҮЙ

Америкийн цомын шөвгийн дөрөвт Уругвайн шигшээ баг бүтэн үе нэг тоглогч илүү тоглосон хэрнээ Колумбын шигшээд 0:1-ээр хожигдсон.

Тус тоглолтын дараагаар Уругвайн шигшээ болон Английн “Ливерпүүл”-ийн довтлогч Дарвин Нуньес Колумбын шигшээ багийн зарим фанатуудтай шөргөөцөлдөж, зодолдохоор дайрч давшилсан явдал гарсан. Энэ зуур нэгэн фанат руу сандал авч шидсэн гэж зарим хэвлэлүүд тэмдэглэжээ.

Хэдийгээр Уругвайн шигшээ багийн ахлагч Хос Мариа Хименес түүний хийсэн үйлдлийг зөвтгөж, стадионы тэр хэсэгт шигшээ багийнхны гэр бүлийнхэн бүр нялх хүүхэд байсан учир хамгаалж, өмгөөлсөндөө тийм үйлдэл гаргасан гэж мэдэгдсэн ч Өмнөд Америкийн Хөлбөмбөгийн Холбооноос Дарвин Нуньест урт хугацааны шийтгэл ногдуулж болзошгүй болсон байна.  Гэхдээ ямар нэгэн шийтгэл ногдуулахаас өмнө хөлбөмбөгчийн тайлбарыг нь сонсох ажээ.

Зөвхөн Өмнөд Америкийн Хөлбөмбөгийн Холбоо ч бус Олон Улсын Хөлбөмбөгийн Холбоо ч Дарвин Нуньесийн фанатуудтай зөрчилдөж, нударга зөрүүлэхээр дайрсан явдлыг тамирчин хүнд байж болшгүй үйлдэл гэж үзэж буй тул клубын хэмжээнд ч тоглох эрхийг нь хасах магадлалтай болжээ.