Евро2024-ийн шөвгийн дөрвийн Англи – Нидерландын тоглолтын хожлын гоолыг “Астон Вилла”-гийн довтлогч Олли Уоткинс төгсгөлд оруулсан. Түүнд гоолын дамжуулалтыг сэлгээгээр хамт талбайд гарсан Коул Палмер өгсөн билээ.
Тэгвэл Уоткинс чухам Палмерийн дамжуулалтаар гоол оруулна гэдгээ мэдэрч байснаа ярьжээ.
“Итгэмээргүй юм аа. Би яг энэ л агшинг хэдэн долоо хоног хүлээлээ. Өнөөдөр энд ирж, ингэж тоглохын тулд хичнээн их хичээн хөдөлмөрлөсөн билээ дээ. Боломж гармагц алдахгүйг хичээн хоёр гараараа чангахан атгасан юм. Тэгээд өнөөдөр сэтгэл дүүрэн зогсож байна.
Амь амьдралаараа, үр хүүхдүүдийнхээ нэрээр андгайлья, би Коул Палмерт “Хоёулаа өнөөдөр талбайд гарахад чи надад гоолын дамжуулал өгөх болно” гэж хэлсэн юм шүү. Тэгтэл яг хэлснээр минь боллоо. Үнэхээр их баярлалаа. Палмерийг бөмбөг авмагцаа над руу дамжуулна гэдгийг мэдэж байсан. Харин бөмбөг нэгэнт руу чиглэхэд тогтоож, аваад өөр хэнийг ч харалгүй, шууд цохино гэж шунасан юм.
Бөмбөг алсын буланд орж буйг хараад... Ээ бурхан минь... би бүр үг хэлж ч чадахаа больчихсон. Гоол оруулсны дараа хүмүүс баяраа биеийнхээ хөдөлгөөнөөр илэрхийлдэг шүү дээ. Энэ удаад тэс өөр санагдсан. Би өөр ертөнцөд оччихсон мэт, хөдөлгөөнөө удаашруулчихсан мэт өөр орчинд оччихсон. Үнэндээ талбайгаас гармааргүй байлаа. Энэ бүхнийг дахин дахин мэдрэхийг хүссэндээ тэр л дээ. Урьд нь би цохилтыг тийм шимтэй сайхан цохиж байгаагүй шиг санагдана” хэмээн Уоткинс өгүүлсэн байна.
Сэтгэгдэл (0)
Сэтгэгдэл бичигдээгүй байна