Евро2024-ийн шөвгийн дөрвийн Англи – Нидерландын тоглолт Улаанбаатарын цагаар өнөө шөнө 03:00-ээс эхэлнэ.
Гурван арслангийн ахлагч, довтлогч Харри Кейнийг өмнөх тоглолтуудад удаан, идэвх хөдөлгөөн муутай байсныг шүүмжилж, гараанд гаргахгүй байхыг зарим фанатууд уриалж эхэлсэн. Тэгвэл Харри Кейн үүнд хариулт өгчээ.
“Хүн бүр өөрийн гэсэн үзэл бодолтой байж, үгээ хэлэх эрхтэй. Хүмүүс намайг тоглолт бүрд гурван гоол оруулаасай гэж хүсч буйг ойлгож байна. Би өөрөө ч гэсэн тэгж хүсдэг. Гэвч дандаа гурван гоол хийгээд байна гэж байхгүй шүү дээ.
Евро-гийн өмнө бэлтгэлээ сайн хангасан гэж бодож буйгаа хэлсэн. Одоо ч гэсэн бодол минь өөрчлөгдөөгүй. Тоглолтоос тоглолтод формдоо орж, илүү хурц, ашигтай тоглох болно. Одоо шөвгийн дөрвийн тоглолт тулаад ирлээ. Хэдэн гоол оруулаад финалд гарчих юмсан гэж хүсч л байна. Ер нь би байнга гоол оруулахыг хүсдэг. Гэвч гоол бол миний ганц үүрэг биш. Бас багийнхаа хамгаалалтанд тусална гэсэн үүрэг байна. Бөмбөггүй тоглолтоо сайн хийх ёстойгоос гадна мөн багийн лидерийн үүргээ биелүүлэх шаардлагатай” хэмээн Харри Кейн өгүүлжээ.
Шөвгийн дөрөвт Виржил Ван Дэйктэй дахин тулахаар болж буй талаараа “Премьер лигт бид хоёр олон удаа бие биенийхээ эсрэг гарсан. Заримдаа тэр надаас илүү, заримд нь би түүнээс илүү сайн тоглож байлаа. Амаргүй тоглолт байх нь гарцаагүй. Миний хувьд Виржилд хүссэнээрээ тоглоход нь аль болох саад хийж, төвөг учруулахыг хичээнэ. Тэр ч гэсэн намайг тааваар минь тоглуулахгүй л гэж гарна. Дэлхийн шилдгүүдийн эсрэг тоглох би дуртай” хэмээн Кейн мэдэгдсэн байна.
Их Британийн алдартай комедиан Шарро саявтархан Кейнийг олон нийтийн сүлжээнд “Харри Кейнээс илүү хөдөлгөөнтэй хөшөөг би харсан шүү”хэмээн шоглосон юм.
“Астон Вилла”-гийн довтлогч асан Габриэль Агбонлахор “Би Кейний тоглолтыг харсан. Талбайн төвд хэнэг ч үгүй зогсож байна лээ. Бөмбөгний араас гүйх ч үгүй, өрсөлдөгчийн хамгаалалтыг сэтлэе, бусдадаа сул орон зай өгье ч гэхгүй л зогсож харагдсан. Би өөрөө ганц довтлогчоор олон удаа гарсан хүн. Ганц довтлогч нь зогсоод байж болдоггүй юм аа. Гүйж, бусдадаа сул орон зай гаргаж өгөх хэрэгтэй байдаг юм. Гэтэл Кейн зүгээр л зогсоод байх юм билээ” хэмээн шүүмжилсэн.
Харин Гурван арслангийн дасгалжуулагч Гарет Саутгэйт “Манай багийн энэ тэмцээний тоглолтууд өөр өөр байлаа. Миний бодлоор бол Харри Кейн маш их ачаалал авч, ажиллаж байгаа. Багийнхаа хамгаалалтанд тусалж, байрлалаа зөв мэдэрч, хаана байх ёстойгоо сайн ойлгодог. Магадгүй зогсоохооргүй түргэн хөдөлгөөнтэй байна гэж хэлэх л байх. Яагаад гэвэл арагшаа татаж, талбайн гүнээс бөмбөг авч, боломж хайх тохиолдол олон гарлаа. Манай багийн тоглолтод Кейн хэмжээлшгүй чухал үүрэг гүйцэтгэдэг” хэмээн өгүүлжээ.
Сэтгэгдэл (0)
Сэтгэгдэл бичигдээгүй байна