Английн шигшээ баг Евро2024-ийн шөвгийн дөрөвт шалгараад байна. Гэхдээ шөвгийн наймд Швейцарьтай хийх тоглолтоос бүтэн гурван хоногийн өмнө тэднийг дөрвөн хамгаалагчтай бус таван хамгаалагчтай загварыг сонгохоор болсон тухай мэдээлэл түгсэн.
Бүр хамгаалагчдын нэрсийг цохож дурдсан юм. Триппьер, Сака нар хоёр захад, төвд гурван төвийн хамгаалагчаар Конса, Стоунс, Уолкер нар байх болно гэж маш тодорхой мэдээлсэн. Люк Шоуг гараанд гаргахгүй, Киран Триппьерт үргэлжлүүлэн найдаж буйг ч мөн тэмдэглэсэн байлаа.
Тэгвэл багийн дотоод мэдээллийг тоглолтоос хэдэн хоногийн өмнө хэвлэлүүд задлан тавьснаар өрсөлдөгч Швейцарийн шигшээд тусалсныг дасгалжуулагч Гарет Саутгэйт сануулан хэлээд шигшээгийн мэдээлэл байнга задарч буйд эгдүүцжээ.
“Шигшээ багийн доторхи нууцлалтай мэдээллийг задруулдаг байдлыг бид яавал зогсоох вэ? Зогсоож чадах ч үгүй юм шиг байна. Уг нь энд бид тэмцээнд түрүүлчих санаатай ирчихсэн байдаг. Гэтэл манай улс, бүр өөрийн улсын шүү, хэвлэл мэдээллийн хэрэгслүүд шигшээ багийнхаа тактикийн мэдээллийг Дэлхий нийтэд задлаад тавьчихаж байгаа юм.
Яагаад ийм мэдээллийг тэгж хамаагүй түгээгээд байгаагаа тэдгээр хэвлэл мэдээллийн хэрэгслүүд зөвтгөх арга олно л доо. Шигшээ багийнхнаас л бидэнд тэгж хэлсэн шүү дээ гэх биз. Гэвч ингэж нууц мэдээллийг ил болгож задалж тавьснаар шигшээ багтаа ямар тус хүргэж буйгаа нэг бодмоор юм. Швейцарийн шигшээд ямар их тус болсон бол?
Магадгүй Швейцарийн шигшээ биднийг яаж тоглохыг мэдэхгүй, бүр өөрөөр ч тоглож магадгүй гэж тооцох байсан байж мэднэ. Гэтэл тоглолтоос гурван хоногийн өмнө биднийг ямар загвараар тоглох, хэн хэн талбайд гарахыг хэлээд өгчихөж байгаа юм. Ингэснээр бидний эсрэг тавтай тухтай бэлдэх боломжийг нь нээж өгсөн.
Мэдээллийг бидний дундаас л тарааж байгаа. Гэвч тэр хүнийг олж илрүүлэх хэцүү. Олж илрүүлэхгүй болохоор бидний тэмцэл, тоглолт улам хэцүү болж байна. Гэхдээ л бид аваргын төлөө өрсөлдөөнд оролцсон хэвээр” хэмээн Саутгэйт өгүүлжээ.
Р.Гэгээ
Сэтгэгдэл (0)
Сэтгэгдэл бичигдээгүй байна