БУКАЙО САКА: ТИЙМ БАЙДАЛД ДАХИАД ОРОХ ЭСЭХЭЭ СОНГОХ ЁСТОЙ БОЛСОН

Английн шигшээ бага багаар мэрсээр Евро2024-ийн шөвгийн дөрөвт шалгарч чадлаа. Шөвгийн дөрөвт тэдний өрсөлдөгч нь Нидерланд байх болно.

Гарет Саутгэйтийн хувьд өчигдөр Швейцарийг пенальтиар хожсон нь Гурван арсланг удирдсан 100 дахь тоглолт байлаа. Саутгэйтийн 100 дахь тоглолтод гялалзаж, тэнцээний гоол болон тоглолтын дараах пенальтийг хийсэн нь “Арсенал”-ын Букайо Сака болов.

Евро2020-ийн финалд Сака Италийн хаалганд пенальти цохиод алдаж, адлуулж юу эсэхийг үзсэн гэхэв. Зүрх зориг муутайхан нэгэн бол дахиад тийм хариуцлагатай пенальтийг алгасахаар байлаа. Харин Букайо Сака өөртөө итгэж, дахиад тийм байдалд орж, өөрийгөө сорьж үзэхийг хүсчээ.

“Ийм дарамтаас зайлсхийх бус харин давж гарахыг би хүссэн юм. Нэг удаа алдаж болно. Харин дахин тийм байдалд орох эсэхээ бол сонгож болохоор байлаа. Тэгвэл миний хувьд дахиад яг тийм сорилттой тулж, яг тийм байдалд эргэн очоод, даван туулахыг хүссэн юм. Пенальти цохисны дараагаар хаалганд бөмбөг орохыг хараад би үнэхээр хамгийн аз жаргалтай хүн болж хувирсан.

Өнгөрсөнд өргөлт өгч, тэндээ үлдэхийг хүсэхгүй. Нэгэнт болоод өнгөрсөн явдал шүү дээ. Тиймээс яг одоо цагтаа төвлөрч, дахиад шинэ пенальти цохихдоо анхаарсан. Намайг пенальти цохихоор болоход олон хүний сэтгэл түгшсэнийг ойлгож байна. Стадионд ирсэн гэр бүлийнхэн маань ч гэсэн их түгшсэн. Гэвч би тайван байж чадснаар чухал цохилтоо амжилттай гүйцэтгэж чадлаа” хэмээн Сака өгүүлжээ.

Тэгвэл Гурван арслангийн дасгалжуулагч Гарет Саутгэйт “Букайо бол манай багийн хамгийн сайн пенальти цохидог тоглогчдын нэг. Түүнд бид хэзээ ч эргэлзэж байгаагүй. Гэхдээ өнөөдөр бол Сака үнэхээр том зориг гаргалаа. Юу давж туулсныг бид бүгдээрээ л мэднэ шүү дээ.

Том тоглолт, том хожил байлаа. Бид аваргын төлөөх өрсөлдөөнд байсаар байна. Одоо тактиктаа илүү их анхаарах болно. Бид шөвгийн дөрөвт гурав дахиа гарч ирлээ. Энэ баг ямар хүчтэй вэ гэдгийг дахин харууллаа” хэмээн өгүүлсэн байна.