Германы шигшээ багийн хаалгач асан Йенс Леманн Евро2024-ийн Герман – Испанийн тоглолтын талаар үзэл бодлоо илэрхийлэхдээ “Испанийн шигшээ бол жаахан бас туршлагагүй хүүхдүүдийн баг” гэх утгатай үгс хэлсэн нь Дэлхийн хэвлэлүүдээр цацагдлаа.
Мэдээж, энэ үгсийн талаар Испанийн шигшээ багийг төлөөлж хэвлэлийн бага хуралд оролцсон 16 настай Ламин Ямалиас сэтгүүлчид ямар бодолтой явааг нь алдалгүй асууж таарчээ.
“Бид энэ талаар бодлоо хэлсэн шүү дээ. Иймэрхүү үгс биднийг энэ тоглолтод улам л ирлэх болно. Эцсийн эцэст тэр хүн өөр юу хэлж чадах билээ? Тэр чинь герман хүн. Шигшээ багтаа туслах, дэмжих л гэнэ. Гэвч эцсийн эцэст бидний жаахан бас туршлагагүй эсэхийг талбай дээр л хараарай” хэмээн Ямаль өгүүлсэн байна.
Мөн түүнээс “Барселона”-гийн тоглогчдоос хэнийг биширдэг талаар асуухад “Клубынхэн бол ихэнх нь Мессиг Дэлхийн шилдэг гэдэг. Харин миний хувьд Неймарын тоглолтыг үзэх илүү дуртай байсан” гэжээ.
“Алтан бөмбөг” шагналыг хүртэх хүсэлтэй эсэх талаар нь лавлахад “Энэ бол хөлбөмбөгч бүрийн мөрөөдөл байх. Энэ шагналд нэр дэвшинэ гэж найддаг. Шилдэг гуравт шалгарлаа ч гэсэн мөрөөдөл биелснээс ялгаа юу байхав” хэмээн өгүүлжээ.
Сэтгэгдэл (0)
Сэтгэгдэл бичигдээгүй байна