Евро2024-ийн А, В хэсгийн тоглолтууд өндөрлөж, цааш өрсөлдөх багууд тодорсоор байна. Өчигдөр Италийн шигшээ 90+8 дахь минутад гоол оруулж, Хорваттай 1:1-ээр тэнцсэнээр хэсгээсээ хоёрдугаар байраар шалгарлаа.
Харин Хорватын шигшээ гуравдугаар байрт 2 оноо, -3 бөмбөгийн зөрүүтэй бичигдэж үлдэв. Одоо тэдэнд шөвгийн 16-д шалгарах найдлага бараг үгүй. С болон F хэсгийн гуравдугаар байрт шалгарах багууд үүнээс бага оноо,–3 –аас их бөмбөгийн зөрүүтэй дуусгаасай л гэж мөрөөдөх боломж үлдсэн.
Италийн хаалганд Лука Модрич пенальти цохисныг Жанлуижи Доннарумма хаасан ч хэдхэн секундын дараагаар өрнөсөн довтолгоогоор Хорватын ахлагч ямартай ч гоолоо оруулж чадсан. Ингэснээр Европын АШТ-ий түүхэн дэх гоол оруулсан хамгийн ахмад тоглогч болсон юм. Гэвч баг нь ийнхүү найдлагагүй шахам болчихоод байна. Тоглолтын дараагаар Лука Модрич юу өгүүлснийг сонирхуулья.
“Шигшээ багтаа дахиад хэр удаан тоглох вэ гэж асуусан уу? Одоо энэ талаар ярих цаг биш ээ. Болдогсон бол хөлбөмбөгөө мөнхөд тогломоор байна. Хэзээ нэгэн цагт замналаа өндөрлүүлэх л болно. Харин яг одоо хэзээ вэ гэдгийг бол хэлж мэдэхгүй байна.
Италитай хийсэн тоглолтын тухайд бол юу ч хэлэхээ мэдэхгүй юм. Хөлбөмбөг заримдаа дэндүү хэрцгий болчихдог. Үүнийг л өнөөдөр мэдэрлээ. Шүглийн сүүлчийн дууны өмнөхөн гоол алдана гэдэг шударга биш ч юм шиг. Шүүгч хаанаасаа 8 минут гаргаж, ирээд сунгачихав? Хожигдлын дараа яаж ч аргадаж, тайтгаруулаад нэмэргүй байдаг юм. Хөлбөмбөг хэрцгий юм аа”
Сэтгэгдэл (0)
Сэтгэгдэл бичигдээгүй байна