ХАРРИ КЕЙН: ЭДГЭЭР ЭКСПЕРТҮҮД Ч ЦОМГҮЙ ОЛОН ЖИЛИЙН НЭГ ХЭСЭГ!

Евро2024-д нэг хожиж, нэг тэнцээд буй Английн шигшээ багийн тоглолтыг хэн хүнгүй л шүүмжилж байгаа. Ялангуяа нэг гоол оруулчихаад шууд хамгаалалтандаа шилжиж, дэндүү хашир гэмээр тоглож буй нь шүүмжлэлийн гол сэдэв болсон.

Английн шигшээд өмнө нь тоглож явсан Гари Линекер, Алан Ширер, Гари Невилл, Мика Ричардс нар энэ удаагийн Евро2024-д телевизийн экспертээр ажиллаж, мөн шүүмжлэхээс цааргалахгүй байгаа юм.

Тэгвэл Гурван арслангийн ахлагч Харри Кейн хариу реакц үзүүлжээ. Тэрбээр хэвлэлийн бага хурал дээр өмнө нь шигшээ багийн тоглогч байсан хэрнээ эргээд одоо үеийнхнийгээ шүүмжлээд буй хүмүүсийн эсрэг дуугарсан байна.

“Английн шигшээд тоглож явсан, тоглох ямар байдгийг мэддэг хэнийг ч би үл хүндлэхийг хүсэхгүй байна. Өмнө нь шигшээд тоглож явсан зарим хөлбөмбөгчид экспертээр ажиллаж байна. Үнэндээ тэдний үгийг сонсохгүй байх их хэцүү. Ялангуяа шигшээд дөнгөж дуудагдсан хөлбөмбөгчдийн хувьд тэдний үг жин дардаг.

Гэвч эдгээр экспертүүдэд бас хариуцлага гэж байх ёстой. Мэдээж, үзэл бодлоо чөлөөтэй, шударга илэрхийлэх эрхтэй. Гэхдээ Английн шигшээд тоглож явсны хувьд бас хариуцлага гэж баймаар юм. Тэд их алдартай. Хүмүүс ч үгийг нь маш их сонсдог.

Хамгийн гол нь юу вэ гэхээр Английн шигшээ олон жил цом өргөсөнгүй. Эдгээр хуучны тоглогчид ч үүний нэг хэсэг шүү дээ. Ямар хэцүү байдгийг мэдэх хэрнээ дараа үеэ ингэж “чанамааргүй” байна. Английн шигшээд, том тэмцээнд тоглох ямар хэцүү байдгийг мэдсээр байж ингэмээргүй байгаа юм” хэмээн Кейн өгүүлжээ.

Харри Кейнийг энэ тэмцээнд бэлтгэл тааруутай иржээ гэх яриа бий. Тэгвэл энэ талаар дүгнэн хэлэхдээ "Биеийн бэлтгэл сайн байгаа. Заримдаа тааруухан тоглохоор алдаа минь үргэлж цохон дурддаггийг би мэднэ. Энэ тэмцээний уур амьсгал хүнд, дарамт шахалт, яриа хөөрөө их. Гэхдээ би формтойгоо байгаа. Дасгалжуулагч намайг хэзээ, хэдэн минут  тогло гэнэ, би тоглох л болно.

Тэмцээний өмнөх бэлтгэлээ харьцангуй сайн хийсэн. Энэ улиралд ямар байсан яг түүн шигээ л эхний тоглолтод оролцсон. Харин хоёр дахь тоглолтод бол багийн тоглолтыг сэргээж, эрч хүчийг нэмэхээр намайг хоёрдугаар үед сэлгээнд суулгасан. Одоо плей-оффт 100 хувь бэлэн байхыг хичээж байгаа. Тэгэх ч болно. Зарим тоглолтод би арагш таталгүй урдаа үлдэх даалгавартай байдаг. Ер нь манай баг бөмбөгийн шилжилт, байрлалын хөдөлгөөнүүдийг сайн хийх зорино. Бид бүгдээрээ өөрсдийн хэмжээндээ хүрч тогловол багийн тоглолт ч дээрдээд ирнэ. Бид илүү сайн тоглож чадна гэдгээ харуулахыг хүсч байна" хэмээн Кейн өгүүлжээ.