Английн шигшээ Данитай тэнцлээ. Үүнийхээ дараагаар хэвлэлүүд болон мэргэжилтнүүд, өмнөх үеийн хөлбөмбөгчдөөс өчнөөн олон шүүмжлэл сонсох нь ойлгомжтой. Эхнээсээ ч дуугарч эхэллээ.
“Манчестер Юнайтед”-ын домог Рой Кин хамгийн эхэнд “Ливерпүүл”-ийн Трент Александер-Арнольдын талаар онцлон ярьжээ. Гэхдээ Киний үгийг хүргэхийн өмнө Данитай тоглосны дараагаар дасгалжуулагч Гарет Саутгэйт Трентийг төвийн хагас хамгаалагчийн байрлалд гаргаснаа “туршилт” гэж хүлээн зөвшөөрснийг дурдая.
“Хоёр тоглолт дараалан хамгийн эхэнд суулгана гэдэг муугийн дохио. Ер нь Трентийг гараанд гаргана гэдэг маш том эрсдэл гэж би бодож байсан. Клубынхээ төлөө төвийн хагас дээр гардаггүй хүнийг шигшээд шууд гараанд гаргана гэдэг эрсдэл. Яахав, “Ливерпүүл”-д хэдэн удаа туршилтад орсон байж болно. Гэхдээ Евро бол туршилт хийдэг газар биш. Би өөрөө төвийн хагас хамгаалалтад тоглодог байсны хувьд ямар хэцүү байрлал вэ, ямар их зам туулах шаардлагатай болдог вэ гэдгийг мэднэ.
Ер нь хамгаалагчийг төвийн хагас хамгаалагчаар тоглуулна гэдэг том зүрх шүү. Хэрвээ Франц, Испани шиг хэцүү өрсөлдөгчийн эсрэг ингэж тогловол бүр хэцүүднэ. Серби, Данитай тоглохдоо бөмбөг ахиу эзэмшиж, Трентийг ашиглана гэж тооцсон байх. Гэвч санасан хэмжээнд хүрсэнгүй. Калвин Филлипсийг орлох тоглогч олж чадаагүй учир Трентийг туршиж үзсэн юм гэж Саутгэйт хэлж байна. Трент бөмбөгтэй үед дамжуулах орон зайг сайн хардаг, сайн гүйцэтгэлтэй байж болно. Харин бөмбөггүй үед, яг тэмцэх ёстой цагт бол Деклан Райс түүний асран хамгаалагчаар ажиллаад таарж байна шүү дээ. Ийм түвшинд нэгнээ асран хамгаалаад байх боломж бараг байхгүй” хэмээн Рой Кин өгүүлсэн байна.
Английн алдарт довтлогч Алан Ширер дүгнэлт хийхдээ “Харамсалтай нь өнөөдөр Дани илүү сайн баг нь байлаа. Бид үнэхээр муу тоглолоо. 30 нас хүрээд хурд минь саарч, хэмнэлээ алдсан цаг үе санаанд орлоо. Тийм үед хөлбөмбөгч яадаг гэхээр эргэн тойронд байгаа хүмүүс эрч хүчтэй байгаасай гэж их хүсдэг. Би бөмбөг “барьж”, мөргөж, бөмбөгөнд зөв хүрч, гоол оруулж чаддаг хэвээрээ ч нэг л зүйлийг чадахаа больсон нь байнга хурдан хэмнэлтэй гүйх. Тиймээс энэ багт би Энтони Гордонг тоглуулах ёстой гэж бодож байна. Энэ залууд эрч хүч, хурдан гүйх, байнга урагш зүтгэх чадал нь бий.
Фил Фоден, Харри Кейн хоёр сайн хөлбөмбөгчид ч гэлээ Гордон шиг хурдтай гүйж, зүтгэж чадахгүй. Ер нь би гүйж чадахаа болиод л шигшээ багт тоглохоо больж байлаа шүү дээ. Кейн одоо 30-тай. Ер нь хурдан байгаагүй. Яахав гүйж чадаж байгаа ч гэлээ хурд алга. Жүд Бэллингэм өнөөдөр урагшлах боломж ч үгүй байлаа. Фоденг зүүнд гаргалаа гээд тоглолтод нөлөөлж байна уу? Үгүй” хэмээн Алан Ширер өгүүлжээ.
Тэгвэл Рио Фердинанд “Өнөөдөр бид тактикийн тал дээр Данид хожигдлоо. Прессинг өндөр тавьж, нэг нэгнийгээ нөхөж, эв нэгдэлтэй байж, тактикийн ойлголтоо сайжруулах ёстой” гэжээ.
Харин домогт довтлогч Гари Линекер багийн ахлагч Харри Кейний талаар ярих нь зүйтэй гэж үзжээ. “Довтлогч хүнд хоёр үндсэн ажил байдаг. Нэгд, гоол оруулах. Хоёрт, багийнхандаа сул орон зай гаргаж өгөх. Хэрвээ би дасгалжуулагч байсан бол Кейнээс арай илүү хичээхийг шаардана. Гурван хамгаалагчтай багийн эсрэг тоглохдоо довтлогч нэг зах руу гүйх, арагшаа татах зэргээр бусдадаа сул орон зай гаргаж өгөх шаардлагатай байдаг. Хагас хамгаалалтын тоглогчдодоо урагш нэвтрэх зай гаргаж өгөх ёстой. Тиймээс би Кейнийг илүү сайн тоглох ёстой гэж үзэж байна. Кейн заримдаа арагш татаж, бөмбөг хуваарилалтад оролцож, бусдадаа зай гаргаж өгч буй мэт боловч маш удаан, их удаан хөдөлж байлаа” хэмээн Линекер өгүүлжээ.
Сэтгэгдэл (0)
Сэтгэгдэл бичигдээгүй байна