Английн “Тоттенхэм”-ийн ахлагч нь өмнөд солонгос залуу Сон Хён Мин гэдгийг хөлбөмбөгийн хорхойтнууд юу эс андах билээ. Энэ багт мөн уругвай хагас Родриго Бентанкур гэх тоглогч бий. Тэрбээр эх нутагтаа очоод телевизийн нэгэн шоу нэвтрүүлэгт уригдан оролцохдоо азиудын тухай тоглоом болгож хэлсэн үг нь эргээд шоглоом болж, шүүмжлүүлжээ.
“Энэ Сонни биш үү? Эсвэл Соннигийн үеэл нь үү? Эд нар чинь бүгдээрээ адилхан царайтай байдаг шүү дээ” хэмээн Бентанкур наргиа хийсэн юм байна. Үүнийхээ төлөө ихэд шүүмжлүүлсэн тул удалгүй инстаграм дээр Соноос уучлалт гуйхад хүрчээ.
“Сонни найз минь, би наргиа хийх гээд тийм юм ярьчихсандаа уучлалт гуйя. Тэнэг наргиа хийжээ. Чамд хичнээн сайн ханддагийг минь, багийнхаа хэнд ч, хэзээ ч муу муухай зүйл хийхгүйг минь чи мэднэ шүү дээ. Найздаа хайртай шүү!” гэсэн үгсээр түүний уучлалт “чимэглэгдсэн” байв.
Тэгвэл Сон Хён Мин энэ талаар “Би Лоло /Бентанкур/-той ярьсан. Тэр алдаа гаргаснаа хүлээн зөвшөөрч, уучлалт гуйсан. Лоло хэн нэгнийг доромжлох гээгүй. Бид ах дүү, найз нөхөд хэвээрээ, юу ч өөрчлөгдөөгүй. Одоо энэ яриаг ардаа орхиж, улирлын өмнөх бэлтгэлдээ эргэн очоод, эв нэгдэлтэй байх болно” хэмээн Сон өгүүлсэн байна.
Сэтгэгдэл (0)
Сэтгэгдэл бичигдээгүй байна