​ РҮНИ АНГЛИЙН ШИГШЭЭГИЙН НЭГ БАЙРЛАЛД САНАА ЗОВОВ

Евро2024-д түрүүлэх хамгийн өндөр магадлалтай багуудын тоонд өмнөх тэмцээнд аман хүзүүдсэн Английн шигшээ зүй ёсоор нэрлэгдэж байгаа.

Гурван арслангийн дасгалжуулагч Гарет Саутгэйт хэд хэдэн дуулиантай сонголтууд хийж, том тоглогчдыг гэрт нь хариуллаа. Жек Грилиш, Харри Магуайр, Жаррад Брантуэйт, Жэймс Мэддисон нарыг өргөтгөсөн бүрэлдэхүүнд дуудсан ч эцэслэхдээ хассан бол үүнээс өмнө Маркус Рэшфорд, Жэйдон Санчо, Рис Жэймс, Бэн Уайт нарыг өргөтгөсөн бүрэлдэхүүнд ч дуудалгүй өнгөрсөн.

Английн шигшээ Еврогийн эхний тоглолтоо Сербитэй хийнэ. Тус тоглолтод ямар гараа гаргавал зохилтой талаар Гари Невиллтэй шууд эфирээр ярилцахдаа Уэйн Рүни юу ярьсныг сонирхуулъя.

“Жордан Пикфорд, Кайл Уолкер, Жон Стоунс, Деклан Райс, Жүд Бэллингэм, Букайо Сака, Харри Кейн нарыг тоглож дадсан байрлалд нь гараанд гаргах ёстой гэж би бодож байна.

Харин миний санааг зовоож буйг ганц байрлал бол төвийн хоёр хамгаалагчийн зүүн талд нь хэнийг гаргах вэ? гэдэг. Харри Магуайр гэмтэлтэй байсан тул өргөтгөсөн бүрэлдэхүүнээс хасагдчихлаа. Энэ улиралд форм сайтай байсныг нь тооцвол Марк Гүэхиг гаргаж болмоор санагдана. Гэхдээ л нэг түгшүүртэй.

26-г сонгохдоо Жаррад Брантуэйтийг аваагүйд би их гайхсан. Люк Шоу гэмтэлтэй байж байгаад дөнгөж эдгэсэн тул хэсгийн эхний тоглолтод зүүндээ лав гарахгүй байх. Тэгэхээр түүний байрлалд Киран Триппьер тоглох болов уу. Гэтэл Триппьер зүүнд гарч буй хэрнээ баруун хөлтэй. Түүний дэргэд төвийн хамгаалагчийн зүүнд гарах хөлбөмбөгч зүүн хөлтэй байвал илүү ончтой сонголт болох байлаа. Тиймээс би Брантуэйтийг зөв сонголт гэж бодож байсан юм. Нидерландад зээллэгээр тоглоод эргээд “Эвертон”-д ирэхдээ энэ залуу шугамыг их сайн авч, анаж тоглодог болсон нь харагдсан. Тэгээд ч том биетэй, түрэмгий тоглолттой хүн төвийн хамгаалагчийн зүүнд гарвал илүү давуу талтай байдаг.

Триппьер энэ улиралд мөн гэмтсэн. Гэмтээд эдгэснийхээ дараа “Ньюкасл”-ын төлөө тааруухан тоглосон. Исландтай нөхөрсөг тоглолт хийхэд ч сайн байсангүй” хэмээн Рүни өгүүлжээ.

“Тулгуурын хагас хамгаалагчаар Деклан Райсыг гаргаад, түүний дэргэд Жүд Бэллингэмийг тавиад, харин тэдний урд буюу 10 дээр Фил Фоденийг гаргах нь илүү оновчтой. Баруун жигүүрт Букайо Сакаг гаргахад эргэлзэх зүйл үгүй. Харин зүүн жигүүрт Энтони Гордонг гаргавал захаа авч, илүү өргөн том талбайгаар довтолж, өрсөлдөгчийн хамгаалалтыг сэтлэхэд нэмэртэй. Гордон захаа аваад тоглохоор талбай томсож, сул орон зай гарч, тэр зайд бусад нь нэвтэрч тоглох боломж олдоно. Ер нь шигшээд яг зүүн жигүүрийг авч, шугам дагаж тоглодог нь ганцхан Энтони Гордон байна. Коул Палмер жигүүр рүү гарч тоглож чаддаг. Гэхдээ төвд илүү ойрхон байвал өрсөлдөгчид илүү аюултай” хэмээн Рүни өгүүлсэн байна.

Гэлээ ч Гарет Саутгэйт бол төвд Трент Александер-Арнольд болон Конор Галлахер нарыг гаргаад Фил Фоденийг зүүн жигүүр рүү өгч магадгүй гэж Рүни таамаглаж буйгаа хэлжээ.

Английн шигшээ С хэсэгт Сербиэс гадна Дани, Словентой орсон.