Евро2024-ийн дараагаар хөлбөмбөгчийн замналаа өндөрлүүлэхээ зарлаад буй герман хагас хамгаалагч Тони Кроос Испанийн “Реал Мадрид”-д нэгэн улирлыг хамтдаа өнгөрүүлсэн 20 настай англи тоглогч Жүд Бэллингэмийн талаар ийн ярьжээ.
“Би Жүдтэй нэг жилийг хамт өнгөрүүллээ. Энэ хугацаанд би түүнээс “Чи яг жинхэнэ насаа хэл дээ” гэж асууж үзсэн. Яахав 20 настай гэнэ лээ. Гэвч талбайн гадна өөрийгөө авч яваа байдал нь бол аль хэдийнэ хэрсүү суусан догь эр шүү.
Англичууд түүнд маш их итгэж найдаж буй нь бас нэг зүйлийг хэлээд байгаа хэрэг. “Реал Мадрид”-д ирмэгцээ л эхний хэдэн долоо хоногтоо тодорхой үүрэг, хариуцлага үүрээд эхэлсэн. Түүнд бэрхшээл, зовлон тулгарч байгаа шиг огт ажиглагдаагүй. Харин ч өдөр ирэх тусам нэр нөлөөгөө улам бэхжүүлсээр байсан.
Бэллингэм бол дарамтыг давж чаддаг эр. Дөнгөж 20 настай хэрнээ аль хэдийнэ бие даасан хувь хүн болоод бүрэн төлөвшчихсөн. Ямар ч дарамтыг хүндрэлгүй давчих сэтгэлийн тэнхээтэй юм билээ” хэмээн Кроос өгүүлжээ.
Сэтгэгдэл (0)
Сэтгэгдэл бичигдээгүй байна