Евро 2024 эхлэхэд цөөхөн хоног үлдлээ. Германд болох энэхүү тэмцээнд Английн шигшээ түрүүлэх магадлал өндөртэй багуудын тоонд нэрлэгдэж байна. Гэхдээ энэ багт Харри Магуайр болон Жек Грилиш мөн Маркус Рэшфорд, Жэймс Мэддисон нарын зэрэг хөлбөмбөгчид багтаагүй.
Гурван арслангийн ахлагч Харри Кейн гэртээ үлдсэн эдгээр хөлбөмбөгчдөөс Харри Магуайрыг онцолжээ.
“Энэ залууст их хүнд туссан нь ойлгомжтой. Ялангуяа Магуайрт их эвгүй байгаа болов уу. Эх орноо төлөөлөн талбайд гарахыг ямар их хүсдэг, Английн шигшээ гэдэг түүнд ямар их үнэ цэнтэйг мэдэхийн хувьд Харригийн өмнөөс би их харамсаж байгаа.
Эдгээр хөлбөмбөгчид Евро 2024-д оролцохгүй нь гунигтай ч Английн шигшээгийн бүрэлдэхүүнд багтах ямар хэцүү вэ гэдгийг мөн нотолж байна. Дасгалжуулагч сайн бодож, маш хэцүү шийдвэр гаргах ёстой болж байна. Үлдсэн тэр залуус энд бидэнтэй хамт байхаар хэмжээний хөлбөмбөгчид. Тиймээс тэднийхээ төлөө бид энд сайн тоглох ёстой. Энд байгаа 26 хөлбөмбөгч бүгдээрээ багтаа чухал үүрэг гүйцэтгэж, хариуцлагатай байх ёстой. Мөн бид бүгд нэгдмэл байх учиртай.
Манай багт олон сайн хөлбөмбөгч бий. Өнгөрсөн улиралд үнэхээр сайн тоглосон залуус байна. Үүнийг үгүйсгэж бас болохгүй. Хөлбөмбөгчийн замналынхаа оргил форм дээр ирээд буй хөлбөмбөгчид байна шүү дээ. Тиймээс эх орноо төлөөлөн тоглох эрхтэй.
Английн шигшээгийн дасгалжуулагч байх угаасаа хэцүү. Олон хэцүү шийдвэр гаргах ёстой болно, олон тоглогчоос сонгох ёстой болно. Дөнгөж 26 хөлбөмбөгчийг л сонгоно. Одоо сонголтоо хийсэн тул сонгогдсон тоглогчид ажлаа сайн хийх ёстой. Дарамтыг хэрхэн давж чадахаас их зүйл хамаарна. Ойрын хэдэн долоо хоногт бид хамгийн сайнаараа тоглох үүрэгтэй” хэмээн Харри Кейн өгүүлжээ.
Сэтгэгдэл (0)
Сэтгэгдэл бичигдээгүй байна