Германы “Байерн Мюнхен”-ий дасгалжуулагчийн ажлаа өгсөн Томас Тухель шинэ ажилд орохоор ярилцлагад орсон ч гэсэн сэтгэл дундуур буцсан тухай хэвлэлүүд мэдээлж байна.
Тэрхүү шинэ гэх ажил нь Английн “Манчестер Юнайтед”-ын ахлах дасгалжуулагчийн албан тушаал байлаа. Хэдийгээр “Улаан чөтгөрүүд” Эрик Тэн Хагийн ажлыг бүрэн дүгнэснийхээ дараагаар халах, үлдээх эсэхээ шийднэ гэсэн ч энэ зуур мөн байж болох дасгалжуулагчидтай уулзахаас татгалзсангүй.
“Олд Траффорд”-ын клубын хөлбөмбөгийн асуудлыг бүрэн хариуцсан шинэ эзэн Сэр Жим Рэтклифф Францад Томас Тухельтай биечлэн уулзан ярилцсан байна. Гэвч уулзалтын үеэр Тухелийг дасгалжуулагчаараа ажиллуулахыг маш их хүсч буй шинж тэмдэг ажиглагдаагүй учир герман дасгалжуулагч Манчестерт очиж ажиллахгүй байсан нь дээр гэсэн бодол төржээ.Үүнийхээ дараагаар хөлбөмбөгөөс түр зуурын чөлөө авч, толгой тархиа сэргээхээр шийдсэн гэнэ.
Харин “Манчестер Юнайтед”-ын хувьд Эрик Тэн Хагийг хэрвээ халбал түүний оронд Английн шигшээ багийн дасгалжуулагч Гарет Саутгэйтийг томилох боломжийг судалж байгаа сурагтай.
Гэвч Евро 2024-ийн финалын тоглолтын маргааш буюу долоодугаар сарын 15-нд “Манчестер Юнайтед” шинэ улирлын өмнөх бэлтгэлдээ гарах тул Саутгэйттэй тохирлоо ч гэсэн цаг хугацаа алдах магадлалтай учир сайтар бодож, тооцож байж шийдвэр гаргах бололтой.
Сэтгэгдэл (0)
Сэтгэгдэл бичигдээгүй байна