АНГЛИЙН ШИГШЭЭГИЙН СОНГОЛТОО САУТГЭЙТ ЮУ ГЭЖ ТАЙЛБАРЛАВ?

Английн шигшээ багт эхлээд 33 хөлбөмбөгчийг дуудсан. Энэ өргөтгөсөн бүрэлдэхүүнийг өчигдөр 26 болгож таналаа. Эдгээр сонгогдсон 26 хөлбөмбөгч Германыг зорьж, Гурван арслангийн өмсгөлтэйгээр Евро 2024-д оролцох болно.

Английн шигшээ багийн дасгалжуулагч Гарет Саутгэйт эцсийн сонголтоо хийхдээ Харри Магуайр, Жэймс Мэддисон, Жек Грилиш нарын зэрэг 7 хөлбөмбөгчийг хаслаа. Тэрбээр сонголтоо юу гэж тайлбарласныг уншвал сонирхолтой байх болов уу.

“Шигшээ багт багтаагүй хөлбөмбөгчид сонголтыг маань ойлгож хүлээн авлаа. Мэдээж, бүгдээрээ өндөр зэрэглэлийн тоглогчид болохоор шигшээдээ тоглохыг хүссэн. Өөртөө бүрэн итгэдэг тэдгээр тоглогчдыг хасах амаргүй байсан ч улирлын турш сайн тоглосон хөлбөмбөгчдийг авах нь зөв гэсэн байр суурийг баримталлаа. Тухайлбал, Грилиш, Мэддисон нараас илүүтэйгээр улирлын хоёрдугаар хагаст сайн тоглосон хөлбөмбөгчид байсан.

Трент хамгаалалтанд ч тоглож чаддаг болохоор шигшээ багийг 9 хамгаалагчтай гэж үзэж болно. Энэ шалтгааны улмаас бид Харри Магуайрыг авсангүй. Магуайр 10 дахь хамгаалагч болох тул багийн байрлалын тэнцвэр алдагдаад байлаа. Харри сүүлийн үед гэмтэл бэртэл нь эдгэсэн ч гэлээ улирал нь бүхэлдээ амаргүй байсныг тооцож, хэсгийн тоглолтод оролцох боломжгүйг нь тооцож хассан.

Харин Люк Шоуг яагаад авсан бэ гэвэл гэмтэл нь бүрэн эдгэж, хэсгийн тоглолтод оролцох боломжтой гэж үзсэн. Бэлтгэл дээр хурдтай, өргөн хүрээний ажил хийж чадаж байгааг нь анзаарч үзсэн. Тиймээс эрсдэлгүй зөв шийдвэр гэж тооцлоо. Тэгээд ч байрлалын тоглолтын хувьд зүүн хөлтэй, довтолгоонд нэмэр болох хамгаалагч бидэнд хэрэгтэй байлаа” хэмээн Гарет Саутгэйт өгүүлжээ.

Евро 2024-д оролцох Английн шигшээ багийн бүрэлдэхүүн:

Хаалгачид: Жордан Пикфорд “Эвертон”,  Дин Хендерсон ”Кристал Пэлас”, Аарон Рэмсдэйл “Арсенал”

Хамгаалагчид:  Льюис Данк “Брайтон”, Жо Гомес “Ливерпүүл”, Марк Гехи “Кристал Пэлас”, Эзри Конса “Астон Вилла”, Люк Шоу “Манчестер Юнайтед”, Киран Триппьер “Ньюкасл”, Жон Стоунс, Кайл Уолкер хоёулаа “Манчестер Сити”

Хагас хамгаалагчид: Жүд Бэллингэм “Реал Мадрид”, Деклан Райс “Арсенал”, Кобби Майнү “Манчестер Юнайтед”, Конор Галлахер “Челси”, Трент Александер-Арнолд “Ливерпуүл”, Адам Уортон “Кристал Пэлас”

Довтлогч, жигүүрийн хагас хамгаалагчид: Харри Кейн “Байерн Мюнхен”, Олли Уоткинс “Астон Вилла”, Айвен Тоуни “Брэнтфорд”, Букайо Сака “Арсенал”, Фил Фоден “Манчестер Сити”, Энтони Гордон “Ньюкасл”, Эберечи Эзэ “Кристал Пэлас”, Жаррод Боуэн “Вест Хэм”, Коул Палмер “Челси”

.

Р.Гэгээ