ОБАМЕЯНГ: АРТЕТА “ЧИ МИНИЙ НУРУУНД ХУТГА ДҮРЛЭЭ” ГЭЖ ХАШХИЧСАН...

34 настай габон хөлбөмбөгч Пьер-Эмерик Обамеянг Францын “Марсель” энэ улирлыг өнгөрүүлэхдээ аргагүй ясны довтлогч гэдгээ харууллаа.

Түүнийг гурван жилийн өмнө яагаад Микел Артетатай тэгтлээ зөрчилдөж, муудалцсаны учрыг одоо хүртэл хүмүүс дэлгэрэнгүй сайн мэддэггүй. 2021 оны 12 дугаар сард “Эвертон”-той тоглосны дараагаар Обамеянг Франц яваад ирэх шаардлага байгаагаа “Арсенал”-ын дасгалжуулагч Микел Артетад хэлсэн гэдэг.

Артета түүнд “Лхагва гаригт яваад тэр оройдоо эргэж ирээрэй” гэжээ. Яагаад тийм давчуу цаг хугацаа өгсөн гэхээр өмнө нь буюу улирлын эхэнд Обамеянг мөн Франц руу яваад ирсэн байж.

Ээж нь цус харваж, биеийн байдал нь базаахгүй байсан учир Обамеянг Францад очиж ээжийгээ эргээд ирэх гэж гуйсан нь тэр. Тэгээд яахав, габон залуу дасгалжуулагчийнхаа шаардлагыг биелүүлнэ, хэлсэндээ хүрнэ, лхагва гаригийнхаа орой эргээд ирнэ гэж амлаад явжээ.

Гэвч лхагва гаригтаа биш маргааш нь буюу пүрэв гаригийн өглөө ирсэн байна. Үүнийгээ тайлбарлахдаа “Ээжийг эмчид үзүүлэх шаардлага гарсан учраас хоцорчихлоо” гэжээ. Энэ тайлбарыг Артета сонссон ч гэлээ хэлсэн амандаа хүрээгүй хэмээн Обамеянгт маш их уурласан байна.

“Би Франц явж ирчихээд бэлтгэл дээр очтол дасгалжуулагч уулзалтаа дуусгачихаад наашаа хүрээд ирлээ. Тэгээд над руу хашхичиж гарсан. “Чи миний ар нуруунд хутга дүрлээ. Бид ямар байдалд байгааг мэдсээр байж яагаад ингэж байгаа юм бэ!” гэж тэр уурласан. Загнаад хашхичаад эхлэхээр нь би дотроо “За, юм дуугарахгүй байя. Дуугарвал байдал бүр дордоно” гэж өөртөө хэлсэн юм. Ер нь би баар сав орж, зугаа цэнгэл хөөж яваад ирсэн юм биш шүү дээ. Яагаад явсан, хаашаа явсан, ямар шалтгаан байсныг дасгалжуулагч бүгдийг нэгд нэгэнгүй мэдэж байсан. Тэгсэн атлаа яагаад тэгтлээ уурлан хашхичаж, намайг буруутгасныг ойлгоогүй” хэмээн Обамеянг ярьжээ.

Энэ улиралд Обамеянг Францын Ла лигт 16 гоол оруулж, шилдэг мэргэн буучдын жагсаалтын тавд тэмдэглүүлж,  мөн Европа лигийн түүхэн шилдэг мэргэн бууч болж нэрээ бичүүллээ. Францын лигийн шилдэг африк тоглогч мөн Европа лигийн Улирлын шилдэг тоглогчийн шагналыг ч мөн хамаад байна.

.

Р.Гэгээ