​ АНЧЕЛОТТИГИЙН ГЭСЭН ЗАГВАР БАЙХГҮЙ!

Европын Аваргуудын лигийн финалын өдөр ойртсоор байна. Зургаадугаар сарын 1-нд Лондоны “Уэмбли”-д Испанийн “Реал Мадрид”-ынхан Германы “Боруссиа Дортмунд”-тай тулж, хэн нь Европын клубүүдийн хамгийн алдартай цомыг гардахаа шийдэх болно.

Мадридын клубын дасгалжуулагч Карло Анчелотти энэ чухал тоглолтын өмнө өөрт нь тогтсон загвар байдаггүй талаар ам нээжээ.

“Надад тоглолтын тогтсон загвар байхгүй гэдгийг та бүхэн бэлхнээ харж байгаа. Анчелоттигийн гэсэн загвар байхгүй. Би байнга өөрчлөгдөж байдаг учраас намайг яг ямар загварын хөлбөмбөг тоглуулдгийг тоймлож,тогтож хэлэх хэцүү. Хөлбөмбөгчдийн өгөгдөл, бэлтгэлээс хамаарч би загвараа сонгодог.

Шөвгийн наймд бид “Манчестер Сити”-тэй арагш сууж, маш хүчтэй хамгаалалттайгаар тоглосон. Энэ улиралд ганц хоёр удаа л тэгж тоглож үзсэн. Ер нь тэгж тоглодоггүй, ихэвчлэн өөрсдөө довтолдог. Гэвч тэгж тогловол хожих магадлал илүү гэж тооцсон юм.

Энэ улиралд бидэнд Бензема байхгүй. Гэвч Бэллингэм ирсэн. Мөн Винисиус, Родриго гэх хоёр гайхалтай довтлогч байна. Гэхдээ хоёулаа жигүүрийн тоглогчид. Ингээд бид Винисиус, Родриго хоёрыг урдаа тавиад, тэдний ард, 10 дээр Бэллингэмийг гаргаж 4-3-1-2-оор гэж тоглож эхэлсэн.

Эхэндээ бидний тоглолтын энэ загвар зохиж байлаа. Бэллингэм ч олон гоол орууллаа. Гэвч дараа нь “Атлетико”-гийн хөндлөн дамжуулалтуудад хэрчүүлж, гурван гоол алдсан учир жигүүрээ хаах шаардлага тулгарсан. Ингээд тоглолтын загвараа өөрчилж, Жүд хамгаалалтанд туслах болсон.

Хөлбөмбөгчдөдөө аль болох төвөг удалгүйгээр шинэ загвар руу шилжихийг хичээдэг. Хэрвээ Винисиус хамгаалалтанд нэмэр болохыг хүсэхгүй байвал хүчээр тулгахгүй. Хамгаалалтанд угаасаа сайн тоглодоггүй болохоор түүнд эрх чөлөөг нь өгсөн. Винисиус 1vs1 үргэлж маш сайн тоглодог. Гэвч жаахан арагш татаж, гүнээс тогловол илүү ашигтай гэж үзсэн. Хурдтай, авъяастай тоглогч ч гэлээ жигүүрт гарахаараа дор хаяж хоёр тоглогчийг хуурч гарч ирэх шаардлага тулгардаг. Харин төв рүү татчихаар нэгийн хүрэлтээр гоол оруулах боломж нь нээгдсэн” хэмээн Анчелотти өгүүлжээ.

“Реал Мадрид”-ын түүхийн талаар Анчелотти ярихдаа “Бид домгуудаа хэзээ ч мартдаггүй. Ди Стефано, Ди Стефано гээд сануулсан, харуулсан зүйлс хаа сайгүй байдаг. Бэлтгэлийн баазад ирэхэд л тодоос тод харагдаж байдаг.

“Сантьяго Бернабеу”-д Бурхан цагаан өмсгөлтэй байдаг гэж ярьцгаадаг. Магадгүй тийм ч юм билүү. Гэхдээ бурхан алдааг өршөөдөггүй, шийтгэдэг гэж би боддог. Хэрвээ алдаа гаргавал цагаан өмсгөлтэй Бурхан өршөөхгүй шийтгэнэ гэсэн үг л дээ.

“Дортмунд” бол сайн баг. Тэдний эсрэг тоглох амар байхгүй нь ойлгомжтой. Тэд их хөдөлмөрлөж хичээж байгаа шиг манай залуус ч хичээж яваа. Бас манайхан их даруухан. Энэ бүрэлдэхүүний гол чанар бол даруу зан юм. Яагаад бид энэ улиралд Ла лигт түрүүлсэн гээч? Яагаад гэвэл эго-доо хөтлөгддөггүй залуус байхгүй юу. Ахмад тоглогчид нь ч адилхан. Тони Кроос, Дани Карвахаль, Начо, Лука Модрич нар “Би, би, би” гэдэггүй хүмүүс. Ирээдүйд яахыг нь мэдэхгүй ч одоогоор манай залуу тоглогчдод том толгойтой хүн байхгүй” хэмээн өгүүлжээ.