Английн “Манчестер Юнайтед”-ын 10 дугаартай тоглогч Маркус Рэшфорд улирал дуусмагц сошиалаас хөндийрч буйгаа мэдэгдлээ.
“Хэдэн долоо хоногийн хугацаанд сошиал ертөнцөөс гарах цаг ирлээ. Багийн хувьд болоод мөн хувь хүний хувьд хэцүү өнгөрсөн энэ улирлын дараагаар сайн амарч, сэтгэлзүйгээ бүрэн сэргээхээр төлөвлөж байна.
Хэцүү цаг үед намайг дэмжиж, урам хайрласан хөгжөөн дэмжигчдэдээ баярлалаа. Бид хамтдаа байх болно” хэмээн Маркус Рэшфорд өгүүлээд сошиалаас гарчээ.
Маркус Рэшфорд 2023/24 оны улиралд Премьер лигийн 33 тоглолтод оролцохдоо 7 гоол оруулж, 2 гоолын дамжуулалт өгсөн байна. Улирлын турш тааруухан тоглосон учраас Гарет Саутгэйт түүнийг Евро 2024-д оролцох шигшээ багтаа дуудаагүй. Тиймээс Рэшфордын хувьд сар гаруйн хугацаанд бүрэн сайн амрах боломж олдож байгаа юм.
Энэ улиралд Маркус Рэшфорд олон жилийн турш найзалсан бүсгүйгээсээ харилцаагаасаа тасалж, хэд хэдэн удаа шөнийн цэнгээний газар очсон нь хэвлэлээр цацагдаж, мөн бэлтгэлдээ хоцорсон тохиолдол байгаа. Өөрөөр хэлбэл, хувийн болоод ажлын талдаа бэрхшээлтэй тулгарсан жил болж өнгөрч байна.
Холбооны цомын финалд баг нь “Манчестер Сити”-г хожиж, цом гардсаны дараагаар Рэшфордын нүдэндээ нулимстай яваа зураг тархсан. Багаасаа явж ч магадгүй тухай яриа гараад буй энэ цаг үед тийм зураг нийтлэгдсэн нь эргэлзээ ч төрүүлээд амжсан. Тэгвэл Рэшфорд яагаад уйлснаа тайлбарлахдаа “Хүмүүс намайг “Манчестер Юнайтед”-д ямар их хайртайг мэдрэг” хэмээн хэлжээ.
Сэтгэгдэл (1)