Английн Премьер лигт багаа үлдээж чадалгүй Чемпионшип лиг рүү унагасан Венсан Компаниг ахлах дасгалжуулагчаараа сонгосноор Германы “Байерн Мюнхен” олныг гайхшруулсан.
Германы түүхэн дэх хамгийн шилдэг клуб өөдтэй амжилтад хүрээгүй, залуухан дасгалжуулагчид гэнэт итгэх болсонд хэн нэгэн нөлөөлсөн нь дамжиггүй.
Тэгвэл хэвлэлүүдийн мэдээлж буйгаар бол ийм сонголт хийхэд хүргэсэн хоёр хүн байгаа гэнэ. Нэг нь Мюнхений клубын шинэхэн спортын албаны захирал Макс Эберль.
Нөгөө нь цагтаа “Байерн Мюнхен”-ийг удирдаж байсан эдүгээ Английн “Манчестер Сити”-гийн дасгалжуулагч Пеп Гвардиола юм байна.
“Венсан Компаниг ахлах дасгалжуулагчаар томилохоор манай спортын албаны захирал шийдсэн. Одоо гэрээний сүүлчийн деталиуд дээр ажиллаж байна. Үүний дараагаар албан ёсоор баталгаажуулах болно. Компаниг авахад Гвардиола бидэнд тусалсан.
Гвардиола Компаниг маш авъяастай дасгалжуулагч гэж бидэнд хэлж, түүнийг авбал алдахгүй гэж зөвлөсөн. Пеп түүнийг сайн мэднэ л дээ. Гвардиолагийн үзэл бодол бидэнд үнэ цэнтэй байдаг” хэмээн Карл-Хайнц Румменигге өгүүлсэн байна.
Сэтгэгдэл (0)
Сэтгэгдэл бичигдээгүй байна