Английн “Манчестер Юнайтед” өчигдөр Холбооны цомыг 13 дахиа өргөсөн. Гэхдээ дасгалжуулагч Эрик Тэн Хагийг халах эсэх нь тодорхойгүй байна. Хэвлэлүүд бол энэ тоглолтын дүнгээс үл шалтгаалан халах нь тодорхой гэж мэдээлж байлаа.
Гэвч Тэн Хаг өчигдөр клубын эздийг эргэлзүүлсэн нэг зүйл хийсэн. Тэр нь гарааны тактик байлаа. Хойлунд юмуу Рэшфордыг үзүүрийн довтлогчийн байрлал дээр тавилгүй, дани залууг бүр сэлгээнд үлдээж, цэвэр довтлогчгүйгээр тоглуулсан. Тэр нь ч үр дүнгээ өгч, Бруно Фернандеш хэмээх үргэлжийн зогсолтгүй гүйж, тэмцэж байдаг ахлагчаараа эхний шахалт прессинг хийлгэж, өмнөө найруулуулснаар хожилд хүрэх үндсэн шалтгаан болсон гэж мэргэжилтнүүд үзэж байна. Үүний дараагаар Тэн Хагийн мэдлэг, ур чадварт эргэлзэх шаардлага байгаа эсэх тухай яриа гарах нь дамжиггүй.
Тэгвэл нидерланд дасгалжуулагч өөрөө тоглолтын дараагаар ийм үгс хэлсэн байна. “Гэмтэл үнэндээ галзуурмаар байдалд хүргэж байлаа. Энэ улиралд бид төвийн хамгаалалтад л гэхэд 15 өөр хослол гаргасан. Гарцаагүй байдалд ороод л тэр. Энэ улиралд манай хамгаалалт 33 удаа өөр гараагаар гарлаа. Софьян Амрабат л гэхэд гурван удаа зүүн хамгаалагчаар тоглолоо.
Талбайн аль ч байрлал дээр гэмтэлтэй. Каземиро гэмтээд, удаан хугацааны турш тоглож чадаагүй. Бидний худалдаж авсан довтлогч Расмус Хойлунд л гэхэд гурван удаа гэмтлээ. Энэ мэтээр би яриад, урсгаад байж болно. Үүнд л манай багийн энэ улирлын хувь заяа оршиж байлаа.
Одоо бид дахиад нэг довтлогч авах хэрэгтэй. Варан явж буй учир дахиад төвийн хамгаалагч авах болно. Үүн дээр нэмж мөн төвийн хагас хамгаалагч авчихвал манай багийн үндэс дажгүй болоод ирнэ. Тэгээд энэ удаагийнх шиг гэмтэлд дарлуулчихгүй бол ирэх улиралд эхний дөрөвт дахиад орж чадна.
Энэ баг сайжирч байгаа. Хоёр жилд хоёр цом гэдэг муугүй. Мөн гурван финалд гарлаа. Мэдээж, үүгээр миний сэтгэл ханахгүй. Бид илүү сайн тоглох ёстой. Хэрвээ клубын удирдлага намайг байлгахыг хүсэхгүй байгаа бол би өөр газар очоод цом өргөхийн төлөө ажиллах л болно. Энэ л миний замналын утга учир шүү дээ” хэмээн Эрик Тэн Хаг өгүүлсэн байна.
Тоглолтын өмнөх хэвлэлийн бага хурал дээр Тэн Хагаас нэгэн сэтгүүлч экспертүүд өөрийг нь шүүмжлэхэд ямар байдаг талаар асуухад ийм хариулт өгсөн байсныг нэмээд оруулчихъя.
“Английн экспертүүд бие биенээсээ ялгарах гэж ядах юм. Яахав мөнгө авч хийж буй ажил болохоор төдий дайны үг хэлэх ёстой гэж боддог байх. Тэгээд “Манчестер Юнайтед”-ыг онилоод, шүүмжлэхэд их амар байдаг байх л даа. “Юнайтед” бол Дэлхийн хамгийн том клубүүдийн нэг. Энэ клубт нэг бол их хайртай, нэг бол үзэн яддаг байдаг. Тэрнээс дундаж гэж бараг байхгүй.
Тэгэхээр муу явбал муу муухай үгээр дайрна. Эксперт гэх тодотголтой хүмүүс баримтуудыг цэгцэлж, дүгнэж чадахгүй хэрнээ зүгээр л шүүмжлээд, дайраад байдаг. Өөрсдөө мундаг харагдах гэж тэр. Өнгөрсөн жил уг нь энэ хүмүүс миний мөрийг алгадаад сүйд байсан. Намайг бараг усан дээгүүр явж чаддаг гэж магтаж байлаа. Гэтэл энэ жил би Премьер лигийн хамгийн муу нь болчих юм” хэмээн Тэн Хаг өгүүлсэн байна лээ.
.
Р.Гэгээ
Сэтгэгдэл (0)
Сэтгэгдэл бичигдээгүй байна