Өнөөдрийн байдлаар Килиан Мбаппэ Испанийн “Реал Мадрид”-д очоогүй байгаа ч гэлээ яг л ийм явдал болно гэж хэвлэлүүд баталсаар байгаа.
Үүний нэг нотолгоо болгож Испанийн Мадрид хотын Ла Моралехад орших үнэтэй эдлэн, тансаг харшуудтай газарт 18 сая еврогоор амьдрах байшингаа худалдан авчээ. Түүний хөршүүд нь Серхио Рамос, Ричард Гир нар байх юм байна.
Серхио Рамос болон түүний гэргий, загвар өмсөгч Пилар Рубиогийнх яг өөдөөс нь харж байрлах бол холливудын алдарт жүжигчин Ричард Гир болон түүний гэргий, испани сэтгүүлч эмэгтэй Алехандра Силвагийнх яг хажуугийн хөрш нь болох ажээ.
25 настай Мбаппэ Францын “Парис Сэн Жэрмэйн”-ээс явахаа зарласныхаа дараагаар Эйфелийн цамхгаас хэдхэн минутын зайд орших итали ресторанд 250 зочин урьж, үдэшлэг зохиосон.
Харин түүний шинэ гэр нь “Реал Мадрид”-ын бэлтгэлийн баазаас ердөө 15 минут машинаар явах зайд оршдог ажээ. Ла Моралеха орчимд өмнө нь ч хөлбөмбөгчид амьдарч байсан. Тухайлбал, Дэвид Бекхэм “Реал Мадрид”-д байхдаа гэр бүлийнхээ хамт 3 сая еврогоор байшин худалдан авч байлаа. Хожмоо түүнийгээ 4.2 сая еврогоор зарсан байдаг.
Сэтгэгдэл (0)
Сэтгэгдэл бичигдээгүй байна