Английн “Челси” гэнэт Маурисио Почеттиног халсан нь хөлбөмбөгийн хүрээнийхний гайхшралыг төрүүлсэн. Хэдийгээр “Челси” дасгалжуулагчаа халж солих зуршилтай ч гэлээ залуу багаа зангидаж, амжилтын захаас атгаж эхэллээ гэх бодол төрүүлж байсан Почеттиног халсан нь ямар учиртай талаар The Athletic судалсан байна.
Клубын удирдлагатай харилцан тохиролцсоны үндсэн дээр ажлаа өгсөн гэх Маурисио Почеттино Лондоны клубээс явах болсон гол шалтгаан нь тэгвэл 115 сая болон 107 сая паундын үнэтэй Мойзес Кайседо, Энцо Фернандес нартай шууд холбоотой байж магадгүй гэх сэжүүр гарч иржээ.
Дээр дурдсан асар өндөр үнээр хоёр залуу хөлбөмбөгчийг авсан учраас суулгаад байх эрх Маурисио Почеттинод байгаагүй байж магадгүй гэнэ. Хоёуланг нь заавал гараанд гаргах тушаал авсан мэт байдалд орсон ч Почеттино хоёр залууд төдийлөн итгэхгүй байсан бололтой.
Мойзес Кайседог тулгуурын хагас хамгаалагч дээр тогтвортой сайн тоглоход байрлалаа байнга тэвчээртэй анхааралтай авах чадвар дутагдаж байна гэж Почеттино үзэж байж. Харин Энцо Фернандесийн хувьд бол талбайн нэг захаас нөгөө зах хүртэл байнга гүйж, өрсөлдөгчийн довтолгоог нураах тал дээр найдвартай биш гэж үзэж, итгэхгүй байсан бололтой.
Маш өндөр үнэтэй хоёр төвийн хамгаалагч нь найдвартай биш санагдсан учир заавал тэр хоёрт тус нэмэр болгохоор дахин нэг тоглогчийг гаргах, ойрхон байлгах шаардлага тулгарсан нь багийн тоглолтод нөлөөлж байсан гэнэ.
Өөрөөр хэлбэл, Почеттино клубын удирдлагынхаа үнэ хаяж, итгэж авсан хоёр тоглогчид эргэлзэж, өөртөө хэрэгтэй гэх өөр тоглогчийг авах талаар санал хэлснийг “Челси”-гийн удирдлага хүлээж аваагүй бололтой. Клубын удирдлага хоёр залуу дээр тулгуурлаж баг босгохыг зөв гэж үзэж буй учир өөр дасгалжуулагч хайсан нь дээр гэж шийджээ.
Сэтгэгдэл (1)