ЭДЕРСОН РОДРИГИЙН ТӨЛӨӨ БУХИМДЖЭЭ

“Манчестер Сити”-гийн бразил хаалгач Эдерсон Мораеш багийнхаа испани хагас хамгаалагч Родригийн өмнөөс уурлажээ.

2023/23 оны Английн Премьер лигийн Улирлын шилдэг хөлбөмбөгчид найман хөлбөмбөгч нэр дэвшсэн дотор Родригийн нэр байгаагүй юм. Энэ нь Эдерсоны бухимдах шалтгаан болсон байна.

“Яахав сайн сайн хөлбөмбөгчид Улирлын шилдэгт нэр дэвшсэн л байна. Гэхдээ энэ нэр дэвшүүлсэн тоглогчид дотор Родри байх ёстой байлаа. Яагаад нэрийг нь дэвшүүлээгүйд гайхаж байна. Үнэндээ бол ийм юмыг хүлээн зөвшөөрмөөргүй санагдлаа.

Сүүлийн жил гаруйн хугацаанд, энэ улиралд яаж тоглосныг нь та бүхэн эргээд нэг ажиглаад үзвэл яасан ч нэр дэвшигчдийн дотор байх л ёстой байхгүй юу. Улирлын шилдэгт нэр дэвшүүлэхдээ ямар шалгуур тавьдгийг нь би мэдэхгүй л дээ. Тэнд өөр сайн хөлбөмбөгчид байгаа нь ч үнэн. Гэвч Родри бол зөвхөн нэр дэвших бус бүр энэ шагналыг гардах боломжтой тоглогч гэж би бодож байна. Тэгсэн чинь харамсалтай нь нэр ч алга.

Одоо тэгэхээр би Фил /Фоден/-ийг дэмжих болж байна. Фил энэ улиралд онцгой сайн байгаа. Багтаа их тус болсон. Олон гоол оруулж, олон ч гоолын дамжуулалт өглөө. Тогтвортой сайн тоглож, багийнхаа чухал тоглож байж чадсан” хэмээн Эдерсон өгүүлжээ.