“Арсенал”-д 0:1-ээр хожигдсоны дараагаар “Манчестер Юнайтед”-ын дасгалжуулагч Эрик Тэн Хагийн ажилдаа үлдэх магадлал өндөрсөөгүй нь лавтай. Тэрбээр тоглолтын дараагаар өөрийнхөө ажлын хэцүү талыг ингэж тайлбарлажээ. Түүний баг Премьер лигийн түүхэндээ үзээгүй 8 дугаар байрт бичигдэж тэмцээнийг дуусгаж магадгүй байгааг сануулъя.
“Дасгалжуулагч бүр бүрэн бүрэлдэхүүнтэй үедээ ажлаа улам сайжруулах боломжтой байдаг. Харин миний хувьд энд хоёр жил болохдоо нэг л удаа яг хүссэн гараагаа гаргаж үзсэн. Маш олон тоглогч гэмтэлтэй байхад багийн тоглолтыг сайжруулах, амжилтад хүрэх хэцүү. Үүнийг зүйрлэж хэлэх юм бол хоёр гараа ардаа хүлүүлчихээд живэхгүйн тулд толгойгоо цухуйлгаж ядан сэлж буйтай адил юм. Бид ингэж л хичээж яваа.
Ийм олон гэмтэлтэй байж боломжгүй санагдах ч үе байна. Гэвч бид байгаа нөхцөлдөө дасан зохицож, ажилласаар ирлээ. Бид өрсөлдөх чадвартай бүрэлдэхүүнтэй. Гэхдээ хожих ёстой, тоглолт бүрт хожих ёстой гэдгийг мэднэ.Гэвч яг одоо дандаа хожоод байхаар тэр нөхцөл боломж үүсэхгүй байна. Ийм олон гэмтэлтэй байхад хожно гэдэг хэцүү юм” хэмээн Эрик Тэн Хаг өгүүлжээ.
“Арсенал”-тай хийсэн тоглолтод л гэхэд “Юнайтед”-ын 10 хөлбөмбөгч гэмтлийн улмаас тоглох боломжгүй байлаа. Эдгээр нь багийн ахлагч Бруно Фернандеш, Харри Магуайр, Виктор Линделоф, Лисандро Мартинес, Рафаэль Варан, Люк Шоу, Маркус Рэшфорд, Мэйсон Маунт, Тайрелл Маласиа, Антони Марсьяль нар юм.
Сэтгэгдэл (0)
Сэтгэгдэл бичигдээгүй байна