Английн “Манчестер Сити”-гийн 23 настай норвег довтлогч Эрлинг Холандыг тааруу тоглосны дараа буюу гоол оруулаагүй бол сошиал экспертүүд болон хэвлэлүүд хэдэн удаа бөмбөгөнд хүрсэн тухай нь нийтэлж шүүжилдэг нь гэм биш зан, гэнэт биш өвчин.
Ердөө 14 удаа л бөмбөгөнд хүрлээ... гээд л шүүмжилж эхэлдэг. Энэ нь тоглолтод ямар ч нөлөө үзүүлсэнгүй, залхуурлаа, идэвхгүй байна гэсэн утгыг цаанаа агуулж байдаг билээ.
“Манчестер Сити”-гийн төлөөх хоёр дахь буюу энэ улиралд Холанд нийтдээ 36 гоолтой явна. Харин өнгөрсөн улирлын нийт гоолын тоо нь 52 байсан. Энэ мэтээр гоолын тоо, бөмбөгийн хүрэлтээр Холандыг үнэлж цэгнэдэг экспертүүд олон болсон. Бөмбөгөнд цөөн хүрнэ гэдэг багийнхаа тоглолтоос таслагдчихаад байгаа ч гэдэг. Тэгвэл тэр өөрөө энэ сэдвээр юу ярьсныг дуулгая.
“Үргэлж л ийм яриа гардаг юм. Бөмбөгөнд тэдэн удаа хүрлээ гээд л ярьцгаадаг. Харин намайг гоол оруулахаар ийм яриа алга болчихдог. Гоол оруулахгүй бол бөмбөгийн хүрэлтийг минь тоолоод эхэлдэг л дээ.
Хүмүүс миний тухай юу ярихыг би хянаж, заах боломжгүй. Тиймээс талбай дээр гараад хийх ёстой ажилдаа л анхаардаг. Ер нь миний ажил бол Родри шиг тоглох биш. Тоглолтыг хянаж, удирдаж тоглох нь миний үүрэг биш. Миний үүрэг бол өрсөлдөгчийн торгуулийн талбайн ойр байж, довтолгоог төгсгөх. Тиймээс хүмүүс юу ч ярилаа гэсэн энэ ажилдаа л анхаардаг. Багтаа туслахдаа анхаарч төвлөрдөг.
Ер нь эцсийн эцэст хөлбөмбөгийг чинь бөмбөгөнд хүрэлгүйгээр ч тоглож болдог л байхгүй юу. Энэ үг хүмүүст марзан сонстох байх. Миний хэлэх гээд байгаа зүйл бол гүйлт, хөдөлгөөн, сэтгэл санаа, тоглолт унших, мэдрэх талыг хэлж байгаа юм. Эдгээр нь хөлбөмбөгийн маш чухал хэсгүүд шүү дээ.
Тэгэхээр бөмбөгөнд хэд хүрэх хамгийн чухал биш. Мэдээж, хүрэх ёстой нь үнэн. Гэхдээ би багтаа яг ямар үүрэг гүйцэтгэх ёстойгоо мэддэг” хэмээн Холанд өгүүлсэн байна.
Сэтгэгдэл (0)
Сэтгэгдэл бичигдээгүй байна