Баг нь “Тоттенхэм”-ийг 4:2-оор хожсоноос хойш хэдэн цагийн дараагаар 24 настай уругвай довтлогч Дарвин Нуньес инстаграм дахь аватарын зургаа л үлдээгээд, “Ливерпүүл”-ийн өмсгөлтэй бусад зургуудаа устгажээ.
Ингэмэгц нь түүнийг өөр баг руу явах нь гэсэн яриа гарав. Юрген Клопп явах болсон учир түүнийг дагаад бас зарим нь явна бичиж эхэлсэн нь ч байна.
Дарвин Нуньес энэ улиралд 18 гоол оруулж, 13 гоолын дамжуулалт өгөөд байгаа. Премьер лигт бол 11 гоол, 8 гоолын дамжуулалт. Гэхдээ энэ тоо олны анхаарлыг гойд татахгүй. Харин Премьер лигийн энэ улиралд 32 удаа отон орсон нь, мөн 27 гоолын боломжийг алдсаныг фанатууд, ялангуяа “Ливерпүүл”-ийн фанатууд онцгойлон анхаарч эхэлжээ.
“Ливерпүүл” амжилттай сайн тоглож, хожиж, аваргын төлөө өрсөлдөх боломж байх үед Дарвин Нуньесийн эдгээр үзүүлэлтийг нэг их анхаараагүй мэт байлаа. Гэвч одоо “Ливерпүүл” хурдаа сааж, “Манчестер Сити”, “Арсенал”-тай аваргын төлөө өрсөлдөх боломжгүй шахам болоод ирмэгц фанатууд нь золиос хайж эхэлжээ. Тэр нь мэдээж Дарвин Нуньес. 2022 оны зун Юрген Клопп өөрөө сонирхон, дурлан байж 85 саяар авчирсан тоглогч.
Үнэндээ ч Премьер лигийн сүүлийн 9 тоглолтдоо 1 гоол оруулсан нь чамлахаар санагдана. “Тоттенхэм”-ийн эсрэг сэлгээгээр гараад хоёр сайхан боломж алдаж харагдсан. Гакпо сул, гоол оруулах боломж ихтэй байрлалд байхад дамжуулаагүй гэж “Ливерпүүл”-ийн фанатууд ундууцжээ. Үүнээс хойш гурван минутын дараа мөн л дамжуулчих боломжтой үед өөрөө цохиод алдчихсан.
“Дарвин Нуньес. Тэвчээр алдарч эхэлж байна шүү” гэж “Ливерпүүл”-ийн нэгэн фанат бухимдсан бол “60 секундээр үнэлье. Нуньес 1-ийн эсрэг 2-уулаа гарсан хоёр сайхан боломжийг салхинд хийсгэлээ” гэж “Ливерпүүл”-ийн өөр нэгэн фанат үнэлжээ.
“Шеффилд”, “Бернли”, “Брэнтфорд”, “Форэст”-д оруулсан гоолуудыг нь хасаад тооцвол Премьер лигийн энэ улиралд 5 гоол оруулсан болж таарч байна. 85 сая паундын үнэтэй энэ довтлогч улирлын турш аваргын төлөө өрсөлдөж буй багт байгаа хэрнээ аварга болгохгүйн төлөө зүтгэлээ” хэмээн “Ливерпүүл”-ийн хасч тооцдог нэгэн фанат дүгнэсэн харагдана.
За тэгээд, Коди Гакпотой зүйрлэсэн үгс бас харагдана. “Клопп ийм довтлогчийг байнга гаргах хэрнээ Гакпог дандаа суулгах юм. Тэгэхээр өөрийнхөө гайг л үүрч” гэж нэгэн бичжээ. “Хэрвээ Гакпог байнга гараанд гаргасан бол ямар ч байсан таван гоол ахиу л хийчихсэн яваа” гэж “Ливерпүүл”-ийн өөр нэгэн фанат өгүүлжээ.
Гакпо, Гакпо гэх үгс хөндүүр сонстохын учир нь нидерланд дасгалжуулагч Арне Слот ирнэ гэчихсэн байгаа. Ирээд нутаг нэгт Гакподоо илүү сайн хандах магадлал бий. Тэгэхээр Дарвин Нуньесийн байдал нэг их дээрдэхгүй байж мэдэх юм. Гэвч гэрээ нь 2028 оны зун хүртэл. Өдий ч байна.
Арне Слот гэснээс түүний одоогийн баг “Фейеноорд”-д Сантьяго Хименес хэмээх мексик довтлогч бий. Улирлын сүүлч рүү гоолын тоо нь буурсан ч гэлээ Арне Слот түүнтэй хамт “Фейеноорд”-оос Ливерпүүлд ирэх магадлал бий. Тэгвэл Дарвин Нуньесийн байдал бүр дордоно. Тэгээд ч шинэ тоглогч авчрахын тулд одоо байгаа хэдээсээ зарж таарах байх. Өөрөөр хэлбэл, Нуньесийг зарж ч магадгүй байдал бий болсон.
Дарвин Нуньесийн эхнэр нь испани бүсгүй. Өмнө нь “Эспаньол”-ын Алейш Видальтай учиртай явсан, түүнээсээ 9 настай охинтой Лорен Манас хэмээх эмэгтэй бий. Лорен Дарвинаас 9 эгч. Хоёулаа нийлээд мөн нэг охинтой болсон.
Испаничууд Английн будантай, бороотой, бүрхэг хотуудад тооцогддог Манчестер, Ливерпүүлд дургүй талдаа байдаг. Тэгээд ч нөхрөөсөө чамгүй олон эгч болохоор Мауро Икардиг Ванда Нара гарынхаа яасаар байлгадаг шиг Дарвин Нуньесийг Лорен нарлаг Испанийн нэг багт очихыг ятгаж дийлж бас магадгүй юм...
Ямартай ч уругвай залуу одоогоор “Ливерпүүл”-ийн өмсгөлтэй олон зургуудаа устгачихаад байна.
Сэтгэгдэл (0)
Сэтгэгдэл бичигдээгүй байна