Английн Холбооны цомын шөвгийн дөрөвт өчигдөр “Ковентри”-“Манчестер Юнайтед” тулж, улаан чөтгөрүүд 0:3-аар илт илүү тэргүүлж явсан ч гэлээ “бариулж”, 3:3 болж тэнцсэн.
Нэмэлт хоёрдугаар үеийн төгсгөлд “Ковентри”-гийн Виктор Торп дөрөв дэх гоолыг оруулсан ч түүнд дамжуулалт өгсөн Хажи Райтыг отонд орсныг VAR-аар тогтоосноор гоолыг цуцалсан.
Адал явдлаар дүүрэн энэ тоглолтын ялагчийг пенальтиар тодруулах болоход эхлээд Каземиро Паненка маягийн цохилт хийх гээд хаалгачид бариулсан. Үүний дараагаар Андре Онана нэг хаалт хийж, тэнцүүлээд шийдвэрлэх пенальтиа “Ковентри” алдсанаар хожигдож, “Манчестер Юнайтед” финалд гарч, хөрштэйгээ тоглохоор болсон билээ.
Тэгвэл тоглолтын дараагаар “Ковентри”-гийн дасгалжуулагч Марк Робинс “Хэрвээ Райт хөлийн хурууныхаа хумсыг өөдтэйхэн авчихсан бол пенальти руу орохгүй байх байлаа. Холбооны цомын финалд гарах боломж тэр бүрий олдоод байхгүй. Бид маш ойрхон, бүр дэндүү ойрхон очлоо.
Бид 0:3-аар хожигдож эхлэхдээ л тоглож эхэлсэн. Тэднийг үнэхээр дарамтанд оруулж чадсан. Багийнхаа тоглогч бүрээр, мөн энд ирсэн фанат бүрээрээ бахархаж байна. Холбооны цомын энэ урт замын турш цуг байсан фанатууддаа баярлалаа. Бид энэ тэмцээний түүхэнд клубынхээ нэрийг бичлээ. Энэ тоглолтын талаар хүмүүс ярьсаар байх болно. Тиймээс харамсаад байх юм алга даа” хэмээн Марк Робинс өгүүлсэн байна.
Сэтгэгдэл (0)
Сэтгэгдэл бичигдээгүй байна