Өнөө шөнө Английн Холбооны цомын шөвгийн дөрөвт “Ковентри”-“Манчестер Юнайтед” тоглох болно.
Тэгвэл сүүлийн мэдээгээр “Улаан чөтгөрүүд”-ээс төвийн хамгаалагч Вилли Камбвала болон хагас хамгаалагч Мэйсон Маунт нар гэмтсэн учир “Уэмбли”-д очихооргүй болсон байна.
Академиас нэгдүгээр баг руу түр татан тоглуулж буй Камбвала гэмтсэн гэдэг нь төвийн хамгаалагчдаас ганц Харри Магуайр л гэмтэлгүй, тоглоход бэлэн гэсэн үг болж байна. Лисандро Мартинес, Виктор Линделоф, Рафаэль Варан, Жонни Эванс нар гэмтэлтэй байсан дээр Камбвала нэмэгдснээр төвийн хамгаалалтад сонголт байхгүй дээрээ бүр тоглогч байхгүй боллоо.
Тиймээс Эрик Тэн Хаг залуучуудын багаас 18 настай Луис Жексоныг нэгдүгээр баг руу дууджээ. Мөн сүүлийн хэдэн бэлтгэл дээр Каземирог Магуайртай хоршиж тоглуулах туршилт хийсэн гэнэ. Үүний зэрэгцээ зээллэгээр ирээд байгаа төвийн хагас хамгаалагч Софьян Амрабат мөн гэмтсэн сурагтай.
Энэ улирал эхэлснээс хойш “Манчестер Юнайтед”-ын тоглогчид 60 гаруй удаа гэмтсэн байна. Эрик Тэн Хаг “Энд 18 сарын хугацаанд ажиллаж байна. Гэхдээ би нэг ч удаа өөрийн хүссэн гараагаа бүтэн гаргаж чадаагүй л явна. Яагаад гэвэл үргэлжийн гэмтэлтэй байх юм. Үүнд их санаа зовж байна” гэжээ.
Сэтгэгдэл (0)
Сэтгэгдэл бичигдээгүй байна